أسمر

طلة عيونك وردتين 
عنقود رموشهم شوكه صابنى يجرح ف قلب الننى 
و يسافر ورا النسمة 
لميت ف جوفى الساقية 
تندهلك
دقيت حيطان الليل نغم سهران
و دوبته ف سمار لونك

طافة غنا

لو إنتِ هنا ..
تقفلى السكة و الساعات 
يكون المشى و الأحلام ف وقت العصر 
تحقن ف العروق طاقة غنا
الأخضر مع الأنفاس إحساس
بيطلق ف الحياة جنة

فى عينيها

كعك

كعك :
تعودت عند غيابك أن أخبز كعكة ..أنت لم تأت وأصبح الحى بأكمله يقتات غيابك

صيف

و أمنية صيف برائحة الليل /
الشرفة المعلقة تختار عينيك للمبيت و شغف أن أبقى هناك مثلها ..ضوء

ندهة شفايف

ندهة شفايف
جوة روح
مشقوقة 
ميت حرف داخل يبوح 
يرتوى 
من غير إشارة مرور
يعدى 
يدوس على الحلم المصدى 
يتمسح أحمر شفايفها
و تتهد الشوارع من حروفها

خرم الروح

مراجيح و عيال بتشخبط ع السور/مفتوح الشوف من خرم الروح المسقوف بيغازل سماو حروف/ قلبك غطاس بيغرق قلبى ف نجمة بعيد و يشاور للموجة تخلف مواعيد المد و تعيش عمر جديد

خطين كحل ف الضلمة

خطين كحل ف الضلمة
شكلي ها اعك
توكة و لمت خناقاتي
ف حلمي يوماتي
شعري المقصوص 
بسنان و ضروس
كل ما ألمه غاوي يفك
النور نايم ف التخشيبة
و اناعلى ساعة الإذن قريبة
و مدير مستني لي مصيبة
و لبست الكوتشي على الجيبة
و رباطها ف السكه يفك
خطين كحل و روج تخاطيف
جبنة و قوطة ف نص رغيف
حشرتها جوة المظاريف 
و الشنطة دفاتر بتزق
خطين كحل و ناس بتعافر
تركب و انا بقى ليا حوافر
خدلت كتافي و مش فاضل
غير شارعين و الكارت يدق
خطين طلعوا لي ف القهوة 
خط الساعة و خط مهية
من يوم خمسة قوام يستهوى
خانة البدلات ساقعه و بتزك
و الزملا قشاط ملعوب بيحك
خطين كحل و سكوا المرايات
و انا على رف السكه متربس ف الإشارات

زحمة برد

و بألجأ لك 
ف زحمة برد
عيونك غيمة
ب تحجب السماوات
تمطر الهوا بإيدها 
يرتوى الزرع اللى طرحه كان سكات
يطل الصيف
عرقان جوة حلم قديم
و لما أغرق يصحينى
تتحول الدقات صور
مهزوزة
بتجرى كإن الجرى كان متحرم
على السكة
و تعود عنيك نقطة عطش ف الشمس
منسية ع الدكة

خبطك على الحكايات 
زى غيمة شتا بييجى الصيف يدوبها

نسمة

طلة نسمة من قلب البلكونة المفتوح / و أنا بالشقلوب على كرسى الروح / و ف إيدى كتاب بيلم جروح / غنيوة طويلة تمسينى و تزغلل ف الساعة لعينى / سهران و بألم الفجر جناح للنسمة يبوح/ طارت ذكرى و رمتنى على العمر المدبوح

صياد

الجرح صياد سمك 
مستنى
دوخة المية
و يطوح الشبك
نيلك عجينة
إفردها بالشوبك 
ناقصها لون
بدرت الحب الإسود شفا 
يعمل رغيف صاحى
على ضفة الجوع ماشية صبية
مشتاق يا صاحبى
للخبيز الحى
و طابور طويل
تهت فين الدور ؟
وقعت
متفرق الخرطوش ف جتة الحواديت
كانه مصفاية
بتسقط الأحلام
ع الأرض
و لسة بيحلمك كل يوم و يلمها م الأرض
و يصحى يقيد الفرن
يستنى الصبية و الرغيف المر

قصاقيص

تهزمنى القصاقيص على توبى 
و أسكن ف حيطان 
مشنوقة العتمة 
و الدوبان 
لا انا قادر أزعق بيك
و لا روحى نغم بيعدى 
يجيك

مرجيحة

الصبح ال راكب مرجيحة كان طاير 
بيقول زوقزيقة 
و أنا قلبى إتعلق بضفاير البنت العطشانة تلمس سموات الحلم و تجدف بالمرجيحة / المركب ..فتحت حضنها و لفوق طارت تتشعلق بسحابة روح لكن يا خسارة ضفايرها إتفكت و وقعت ع الأرض بجناح مدبوح
.....

سكة

الحارة الشمال بتحدف ع اليمين 
نص شارة ونص رمش مفتحين
الترجمة لعبت ف خط جبين
روحين 
و إتقطعت السكة من غير لقا
و رسموا ع الأسفلت طفلة و إيدين
و خطين صفر 
و اللى واقف قصادك مش عنين

بتخبط

بتخبط 
متاريس الروح مش فاهمانى 
أقفل تانى 
و إﻻ يعاود طيرى المدبوح
كلها نقطة و أول سطر 
و خطين بوح
كحلت سحابة معدية و سبقها القطر 
رخت أحﻻم لميتها ف حضنى 
و سرقت ضلوعك لأنفاسى
قلبت راسى 
و حدفت حلمين من ع السطر

ال فوق حياة

ال فوق حياة غاوى ينكسر منى 
و أنا فوق عنيا الننى مش جوة 
بصيت و مالت شوفتى تتغندر
الكحل غمى السكة و جرحنى 
لا قدرت أخطى و لا رموشى بقت منظر

مساء الخير

معلقة السكر سهرانة جنب الكوباية ..الشاى ده تقيل ..كل ده تأخير ..نعناعك طالل ع الضحكة و ينط يﻻوع ف التفسير و يقول ده كتير ..كل ده تأخير ...... يا مساء الخير

وحدن

و بعد ما يغفا السهر يقطفنى دقات الحيطان
و صوت نغم عطشان
شديت غطايا بيدى و قع الهوى من خدى
صحى صفيره أبواب الجيران

..................................

زار

لِم الكراسى 
الزار خلص 
كل اللى فاضل جوة روحك يتخرس
يا صاحبى من غير عتب 
الروح راكبها قتب
لا بتجرى و لا بتمد 
لِم الطريق م البرد 
الضل مش للشجر 
الضل خوفة ورق على بعض
و أنا آخر حدود الضل 
فرقت روحك دفايات
على وش الشتا
و فتحت باب الصيف
صقعت

أتر

شايل أتر ف الرمل ورا صورتك 
و أنا قدمى منتور ع الهوا
بيطير يوشوش روحك
و يعزم على وردك النابت ف حضن المالح
بشربة نيل
تتبسم 
يتوه القمر و يوهب ضيه للمية

تانى

خربش الضل
و نادانى
قلت تانى
لازم أقتل فيه عنيا
دمه مش هاين عليا
دقتين و إمسح ف لونك
ع القزاز
غصب عنى
مركب الرحلة بيهرب جوة منى

سنامكى

سنامكى

و شارب ل كعانى

سهلى طريقى و عدانى

سنامكى

و كان قلبه عليا

و طريقه مسالك أمنية

سنامكى

و فارش ع السكة

كراريس و أنا دمى ع الدكة

سنامكى

طابونة جار ليا

بتسقط قمح حديد فيا

سنامكى

أكلت العيش ميرى

و حديدك سخن على جبينى

و سكعت خميرك

ف أرزاقى

فرقع ف طابونة و غطينى

سنامكى

واقف ف طابور

قدامى كنيف و أنا ف الدور

القلب كفيف و عصاية توقعنى يوماتى

بلا قافية تزفلط ف حياتى

دخان

ع الضفة التانية م السكة
دخان
يافطة محروقة
سهم هربان
و التانى فوق الحيط بردان
لخبط المشاوير
جريت
القلب عرقان
نقط على بابك بطعم الملح
عديت
و شفايف شققوا من سندة الحبر
على لونهم
لملمت طيفك م البيوت السهرانين
بلسم شفايف
و نفخة للهوا فتحت قلب المخدة
ضمتنى و غفيت

بالونات

فاكر لما تخبطه ف الحيط ها يطيب
ها يتشرخ
و ينقط العشق اللى مخنوق جوة منه
و يمكن ف صدرك ينفجر
و يطير الروح بالونات
يمرجحها الهوا
بيسافر لبر عيونك و بيلمس البسمة
شفايفك
من حرقة اللون اللى نابت فوق خدوده
الهوا ثورة حدود البالونات
فجر حدوده و دخل لحدود هواك
شديتنى مع شهقة نفس جواك

غياب

أحتفى بالغياب فيداعبنى خمر كلماتك و الذكرى تتراقص شرهة لفتات مائدتى محترقة الأرجل ..أثمل فيك ..فيرتعش الغيم بكأس يمطر صورك و أعواد الثقاب يصيبها المطر / رطبة هى كأجفانى المعلقة ببندول الساعة / تقترض اللهب لتشعل الإنتظار .. فيتثاءب الوقت..
....
يأتى دوماً الصبح الآخر .. المرآة تثب داخلى و فى الخارج مائدة لا أعلم من يشعل فيها النيران فى غيابى .. أفتح شهيتى للخارج ووجبة إفطارى أعينهم أتناولها و ألقيها فارغة لسلة بلا ذاكرة

جورنال

و بأحس إنى بأشب على أكتافك
زى العيل
ساعة ما يلاقى أبوه
بيميل ع الجورنال
طبع و بيضايقك لكن لو فارقك
تيجى تقوله حبيبى إزيك
بص معايا
تبقى مضايقة حلوة جنان 
نظرة و تاه فيها العنوان
قلبك متعشق حواديت ليها
كل اما تحاول تلمسها
تطير ف حكاوى عنيها
و العشق يرفرف ورا عصافير الروح حواليها
ف تزقزق جواك الفرحة
تجرى عيونك ع الشباك
زى العيل
و تطير ورق الجورنال

صورة 2

صورة

إمبارح

إمبارح طوحت مرايتى
و إتصورت
حاجة لأجل تسليك ف الغربة
و تبوظ لك مليون فرض
إتشعلقت ف خيط أحلامك
و طلعت
بصيت ع الحلم المفتوح قدامى
لون البحر
و بلعت ف ريقى م الفرحة
زورت
إتكعبلت ف باب العدسة
و قبل ما أطلع ف الروح
زغللت
شديت آخر سطرين ف جوابك
زى القشة
غرقت
و لقيت ضلمة حبر بتتعافى
و تزق ف ضهرى
نطت صورتى من جوفى
إتزحلقت
و لقتنى على الأرض وقعت

إزار