مش عارفة ابعت لِك جواب

مش عارفة ابعت لِك جواب
ما تقلبيش ف دفتر الحواديت
إنتِ كون و عيش و بيت
إنتِ كل اللى إتبنى
ما تفكريش غيرك مافيش غير السكات
و حبال غسيل متقطعة
لو كان بإيدى كنت حطيتها ف إيدك
صدقينى
قلبِك انتى اللى رسم كل الجمال
ما تفكريش
و لما نقدر نبتسم جوة قلوبنا
إبقى إبعتى لى
اللى إكتشفته إنى بحبك
فما تقلقيش منى
إنتِ ف أسامى الننى
...
 إيناس البنا

صديقتى

و أشوف دموعِك يا صديقتى
أغلى م السكة و عيونها
صورة منى أو صورة منك
مش عارفة مين زق المطر
وصلنى جنبك أحضن ف قلبك دعوتين
..
إيناس البنا

و أحلم براحتى

نفسى يعنى لو يطول الحلم حبة
جوة قبة نوم لوحدى
أزق كل ال مشتاقة له يتقسم
و الليل يعبينى ف نجوم
أضوى سنة و أدبل ف يوم
أسلم قلبى للحدوتة قبل النوم
أول الدخلة برعشة
لمسة كابوس مشيتي من ع المخدة
إسمه ف فن الوسوسة.. تحابيش
أدخل ف فرن الغولة مرة
ما يكفنيش
و أنفخ ف كومة قش
ما تطيرش
أتخض و أخرج
أستعيذ
و أدخل بسرعة
أحلف على المرايات تتوب
يا مراية مين من غير عيوب ؟
تقولى إن " سنو وايت "
أجمل ما فيها " إزم " شكله بتاع بنات
و" آليس " صديقتى بقى فنجانها فاضى
من يوم ما جاعت باعت المرايات
و جت سكنت قصادى
..عزلت منى
و صحيت على باب الجيران
ف إديا مية متسمى عليها
برايا كام عفريت عطشان
يا نومة قصدك سد خانتى
م الدوخة
عايزة ريشة وورقة من بختى
نفسى مرة أحلم براحتى
.......؛
إيناس البنا

عزا

قاعدة ف كرتونة عزا
كذا و كذا
مناديل و حبة قزقزة
يا اما و يا ابا
يا كلمتين ونس الغلابة
دنيا و سلفاها الديابة
و إنت يا ابنى
مولود ع السكة الربابة
ممكن نقول منقوع مدد
إفهم بقى
و شد ضهرك م الهدد
ما تقولش آه راح السند
ده اللى خالق لك سند
قادر يكون سندك
...
إيناس البنا