لأخويا

حبيبي يا اخويا يا عكازي لما كبرنا سوا
ب طلعة آهاتك مشي قلبي انحنى
يا شق الشقاوة
عمري طارح لك فدادين غلاوة
لما لقيت ولدي بيكبر قدام عنيا
حبه ملخبط مرة بيضحك مرة حنين مرة حزين و ساعات غباوة
أقسى و بأزعل مني حتى قبل زعله
لو مرة يعيا روحي ترقد جنب منه
مش دي القضية
كل اما يسبق لساني  ينده اسمك بداله
ألقى قلبي قلب أمي
أفرط على غيابك قلق
و اعيش دعوة صاحية لفكر انسرق

#إيناس_البنا

نفسي مرة أحلم براحتي

نفسى يعنى لو يطول الحلم حبة
جوة قبة نوم لوحدى
ازق كل ال مشتاقة له يتقسم
و الليل يعبينى ف نجوم
اضوى سنة و أدبل ف يوم
أسلم قلبى للحدوتة قبل النوم
أول الدخلة برعشة
لمسة كابوس مشيتي من ع المخدة
زى ما تقدر تقول ف فن الوسوسة.. تحابيش
أدخل ف فرن الغولة مرة
ما يكفنيش
و انفخ ف كومة قش
ما تطيرش
أتخض و أخرج
أستعيذ
و أدخل بسرعة
أحلف على المرايات تتوب
يا مراية مين من غير عيوب ؟
تقولى إن " سنو وايت "
أجمل ما فيها " إزم " شكله بتاع بنات
و" آليس " صديقتى بقى فنجانها فاضى
من يوم ما جاعت باعت المرايات
و جت سكنت قصادى
..عزلت منى
و صحيت على باب الجيران
ف إديا مية متسمى عليها
برايا كام عفريت عطشان
يا نومة قصدك سد خانتى
م الدوخة
عايزة ريشة وورقة من بختى
نفسى مرة أحلم براحتى
....
#إيناس_البنا

لابني

يا حبيبي يا ابو العيون دبلي
و الرمش بالكحلة
كل العيون ف الكون قدام عنيك وحلة
تقولي يا ماما خانة الغرام تتملي
يملا الدفا ضلعي من ضمتك يا ابني
و اخاف عليك من هجرة الأحضان
التوهة ف العناوين و الراحة ف النسيان
خايفة عليك تستهل الخدعة
و تبص على سكتك تشوف الصدق بدعة
خايفة عليك من زحمة الملايات
من صحبة الأشباح و الأنس بالحكايات
أفك يدي اطلقك للحياة تسعى
و اسد خوفي بدعوة المولى

إسمه أحمد

إسمه أحمد
أصغر من الحكايات لإنه
 لسة ما عرفهاش
قلبه كان يرعش من الخوف لما أقرب منه حقنة
بس واقف مش بيرمش
صرخة تفلت
يقولى عادي أصله دور برد النوبة دى
حقنة واحدة مش بتوجع بس ممكن تبقى آخر واحدة ديا
شفته تاني بعد غيبة
شعره واقع بس سبقه جوة روحي
قلبي واقع م السؤال
يحكي و يضيع جروحي
ال قد فتفوتة عنين
قدام عنيه المليانين طيف زي ضحك زي صبر زي ما بتحكي تقولي
بطلت أصرخ م الإبر
....
#إيناس_البنا

فاطمة ستي

ستي
إمبارح شفتك
بعد اما سنانى ما وقعت ف الحلم
شفتك علم
لونك شاحب
مش عارف مين راح للتانى
مين اللى إتنهد لثوانى
مسافة السكة مسافر
و أنا نايم ع الدكة
و قلت بقلبى علو الصوت
وحشتينى
و نفسى أعدى و أروح لك
تضمينى
مخدة تفوق و يوم ييجى
و حضن يفارق القِصة
و بأستنى معاد الليل
و أنول من طلتك حصة

#إيناس_البنا

إستخدامات

لم يعد لدي الكثير من الإستخدامات للحياة
كمقدمة لامعة أكتبها هنا على شاشة الجوال فأجفل ريثما تجتمع الكلمات
ثم تنطفيء الشاشة كي اجدني بصورة منعكسة على  مرآة معتمة  ما يلمع هو إطار منظاري فقط اما لمعة عيني فقد انطفئت منذ زمن طويل رغم اني كلما نظرت للكاميرا أحفزها للخروج
تلك اللمعة تمردت فاحترقت كأي فراشة صغيرة تعانق الضوء  ..الحب    ثم الإحتراق
و   لم أعد أرفع رموشي للأعلى بإصبعي كي تستيقظ فتنة نظرتي .. فقدت إستخدام الفتنة
أشرب النسكافيه بالماء المثلج لا أذكر اين سقطت مني رفاهية الدفء و اللبن
أنظر لعيون القطط فتسقط مني آفة تسير عارية القدمين تحب ملمس الأتربة و رمل الشارع ثم أحك جلدي فتعود لمعتقل الأحذية

من لا يقرأ لا يُقرأ فلم أصبحتُ أحبُك اكثر ، أكتبك قليلا و لا أقرؤك

شكرا لأبويا

و ف اكتوبر باقول شكرا
 لأبويا اللي قعد ف الحرب ست سنين
 و لما حب يتجوز بياض الشقة خد منه يومين اتنين
و شقيان العريس يا اهل الله دي اجازة سبع تيام
و مستحمل يضيع منها ف فرح ساعتين
و ابويا كيماوي قمحاوي
ف ضهر الشارع المنسي
لقاها عجوزة و عيالها من النوع اللي مش غاوي
سابوها تضيع بلا متوى
اخدها معاه و سكنها كمان وياه
و شقة ابويا مقسومة بشكل القلب
و قلبه يساع قلوب ياما
قسم لقمة و لمبة جاز
ما بينه و بين قليلة الناس
و نط له يوم حرامي غشيم
سرق هدمة و حزام و مداس
و ابويا اتعك ف الجندية ست سنين
كيماوي و يملا ضي العين

#إيناس_البنا