فيلم قديم

فهمونا زمان إن غنوة الفيلم دايماً للحبيبة
و صحينا بعد الغنوة بنغنى
و كل بنت جواها صورة م الفيلم
بتتحرك
بتروى الحكاية زى زرعة قلبها
و الحكاية أصلها ليلة ب ورقة نتيجة
بتتغير
كنت بأكرمش الورقة و أرميها
زى برضه فيلم قديم لكاتب فكرته تايهة
بس كرمشتى إنتقام من يوم خنقنى
حالف ليعمل عقدة
وينط فوق الحل و يغميه
بأقفل عليه الحلم يفتح لى
ماسك إيديا و مركز على الننى
و فريد "و حياة عنيكى "
حضن و يقول " مش كفاية"أصحى من خوفى
و أكتفى بالحلم صابح
كل يوم يشرق معايا و ينطفى
من كام سنة
نجمتين الحلم هربوا
ماسكين ف سيرة مين عايشنى و مين أنانى ؟
بليت ف أستيكة و مسحت الضى
و نزلت ع الأرض فارد إيديا بحضنها
النخلة زقتنى
مسك فيا البلح
وزى اليويو علقنى

إسمك ما سرقنيش
إسمى اللى ف عز الطلق
كتب ف ميلادى
بنى آدم
تحت التفتيش

إصطباحة

بتلم شعرها المنكوش ف فيونكة مرسومة بقلم جاف
تبص ع المراية و تقلد تمر حنة
" تتعب يا وله "
و بعدها تمسح النضارة
و تصب قهوة الصبحية جوة البرطمان
تطير
و صوت فيروز ف دماغها بيغنى
.. ....؛

مرجيحة

و متشعبطة روحى ف مرجيحة
خشبة من غير حيطان
يمكن تزيق تعترض
مش وزن عيل يا أسمِك إيه
لكن بتعشق خطوتى
بالليل معادنا
لما بتستخبى عيونه
ف "الكافتيريا"
أعرف إنه خلاص زهق
أخلع التوب الحرير
ألبس التوب الضفاير
و أجرى ليها
تفتح اديها ال حديد
تضم
بأدف تطير
و لحن بيمطر م السما
نرتوى
و ننام خفيف
تزق سنين بلون غامق
يخاف الليل من المطرة
و م الطيران
و تنزل الستاير ع المراية
بأقفل الصندوق على المشهد
و أخيط روحى ف حكاية
و أجمل خشبة عصفورة

شباك

الشباك ده
بيفكرنى بشباك بيتنا زمان
و أنا بونبونى
كان يفتح على طاقة شُبان
عارف البنت المكسوفة جداً
لما بتبقى ستارة خفيفة
لبنى و بجناح سوليفان
شوقها يعدى / يجوز طيران
تلمس فيه ضى الضحكة
بتحب الشيش مفتوح
و نكتة تدفى خدودها
ف عودها تدندن
فكت كل زراير اللهفة
تتنحنح
و تلم ف توبها
طلت تانى ترسم شعر و دقن خفيفة
و تلوم نفسها لو يلمحها
و بتتمنى يا ريت يلمحها
هى الطلة دى آخر مرة
ترفع رمش تنزل عشرة
بيبص لها
يا وقعة مليون لحن ف راسها
عنيه تتحب
ردت زى الطلقة ف قلب
و درابزين الحلم شبكها
قبل ما تتكعبل و تطب
سحبت روحها
و رجعت لكتاب حيران من حالها
كل يومين يتشخبط قلبه بدوايرها

وطن

وطن عاشق ما كانش معاه غير تمن تذكرة مرسح
شبك ال "بهية " فوق دراعه
ترجم ف شوقه بغمزتين
دعك الفانوس
طلع الصنم
و قال يا شبه محترم
ممنوع دخولك
و إزاى و ليه ؟
أصل البعيد كان جاى حافى
و التذكرة بقزاز فيميه

عنب

العنب البناتى ف قلبك يوماتى
" حرج عليا بابا ما أروحش السينما "
تقطف لها فاترينة ورد النيل و تطير
قبل ما توصل للشباك
تلمح ع الناصية التصاوير
شالها حرير
طرفت روحك
و جناحك مخلوق عصافير
روح و التانية
تلقى الحلوة ف كادر الشاشة
ورق مناديل

فار

السلك اللى محاوط بيه ع القصة
قرقضه فار
طلعت تتدارى الحدوتة ف قلب عيال
شدوا النبلة و طوحوا فيها
و اللى قانيها
ربط الشاش ف دماغه
و قفل الجرح عليها
....

زى البحر

بهتت شفايفها على عنيا
عشقتنى  مدن جنب الكورنيش
و أنا قلبى دواية بتنور طيش
و غوانى الفرن بشكل العيش
و ترد عليا :
....يا رغيفى يا جعان تحابيش
فك الدواليب اللى ف رسمى
طلع بره الشوق اسمى
الشمعة بريئة من الإحساس
و الهوا عصفور واقف ف اشارة الأنفاس
بيرفرف
كام ثانية
و يقعد ع الدكة يخرف
عارف لو دقدق ف الطيران
ها ينط صاروخ بره الكوكب
يغدر به الهوا و يعود للأرض
يفرد يده ما يقابل مد
ف يلف مدار يمكن يتهد
و إنت ف قلبك زى البحر
شايف الموجة بتشغى جنان
يبقى شاريك الهوا يا فلان
فجأة يسيبك لما يعدى باكو لبان

أحمر شفاه

أحمر شفاه ...؛
أحمر شفاهى الجديد أتمنى أن يعجبه فأنا لم أصبغ شفاهى بهذه الدرجة من الأحمر من قبل "فاقع قوى " ثم أعود للمرآة لأطلق خصلاتى المموجة مع نثرة عطر على جسدى و الرداء ..نظرة أخيرة ثم < قبلة طائرة > و أخرج للردهة ..لم يتحرك أو ينظر تجاهى يبدو مستغرقاً فى أمر ما .. جلست قرابة الساعة أمامه و لم يلتفت إلى "و لو ..لن أهتم ".. و فتحت حاسوبى إعلاناً منى باللامباﻻة.."مساء الفل بقى تحت النظر إرمى لى نظرة و إﻻ إبتسامة حسنة و تنفع يوم القيامة تررا"...كانت هذه كلماتى ف رسالة بعثتها إليه على حسابه الشخصى بال "فيسبوك" و إنتظرت الرد طويلاً و بعدها نظرت إليه معاتبة و .."تشرب قهوة معايا " و دمعة تنذر بأخواتها مع خطواتى للمطبخ و لمسة للإطار المعلق يعلوه شريط أسود .."أكره هذا الشريط "
.....؛

حنفية

كل الموضوع

إن دماغي تحت الحنفية

بتسقط منها أسامي كتير

بتروح ف الميه

و صابونة شاهين بتحك ف فروة راسي

زى الصقر بتنتف جدر الشعر

و الأحلام و تظبط عش مقاسي

إحترت أنا مين ؟

بيضة ف عشة

و إﻻ ف تربة

و إﻻ أنا سكة ف زحمة رجلين

تحت الحنفية

لسعانى الميه بقى لها سنين

لما بديتها

كانت الشمس ف عيني بتلمع 

كنت بافتح و لا اغمضها

ﻷجل الدعوة مكرمشة يا أمه

تايهة البوصلة و بتشرق على ناس تانيين

آخر التوهة بربشت و غمضت

مظلوم إنت معايا يا وش الأرض

شقيتك بالطول و العرض

كومت الصحرا ف قلبي

كبرت فاتورة برشام الضغط 

شمرت 

و بعزم ما فيا عزقت

بعد الفحت و الدوس و الشد

 زرعوها بارود 

لميت الغلة و زغرطت

بعيار طايش عورت سحاب 

و الفرح اتكلبش قبل ما يوصل للباب 

هربانة حكاوي من غير ميه

عملت بدموع الناس   حنفيه

خدش

لعب العيال ف الحوش حياة
دوشة
مش قادر أغمض عنيا
يا ولاد بهية
صوتكم عنيا
و ندهتى بينكم محشورة بين طوبتين
الخطوة فوق قلبى خضار صاحى
رفرفت بجناحى
طخ الهوا عيارين لفرحى
طايش عيارك
و زادوا ف التراب / صاحى

بلحة

و البلحة حلوة و غندورة
كان حلمى أرسمها ع النخلة
طارت سبقتنى العصفورة
وقفت بتحَجز ع النظرة
لا منها قادرة تقرقشها
و لا منها خرجت م الصورة

 

يمين

قلت إحلفى و النور قطع
و الشجرة قدام بيتنا عاشقة خيال الضل
رسمت ورق عصافير
و ضى مراية شمس
نطيت ف دوشة عيال يتونسوا بصوتهم
بتغمزنى المراية بعِرق قهوة
زقزقت
صفحة سما غامقة
على كفها الحواديت
بصيت
و يمكن طرت
و حلفت لك على ضى نجمة مضفرة المرايات
إنك ..وشوشة بينى و بينها
و حضنت النجمة عنيا حرقتنى
و زعيق عيال م الحلم زقتنى

صبار

صبار زمانك
كل ما أقولك روحى ثوانى
تجرى و تقطف شوكة عشانى
رحت أوصى الساقية
-وقعت ف عرضك مية ف أرضك
فلتت منى بضحكة عويصة
حدفت كام حلم ف تقفيصة
-أصلك طالبة فوق العادة
أجرى محطة زيادة
أدهن حيطة بلون شفاف
يمكن غيط الورد يعدى
يلمس خدى
على صوت صفارة شديت يدى
و وقعت
لما ألمسك و أنا نايمة تانى
إقفل الشباك و خيط ف المخدة عيون
شفايف
و إوعى شعرى يبص خايف
خطوتى تصدق و يمكن تتفتح ف القلب وردة

برواز

و بروازك اللى قماشه فانوس
ينور
يدور
فيهرى ف قلبى يسوى الغموس
عارفنى بألاوعك
و تجرى ها أطاوعك
و مساكة نلعب ف زحمة تروس
تزقزق لنسمة
أحدف ف صوتك
بورقة و ننى
تكرمش عنيا و تدارى منى
أقول غصب عنك
تقول غصب عنى
ألون يدينك بأحمر شفايفى
تلون عصيرك و تسقى ل طيرك
أقولك يزيدك و ألمع ضوافرى

ضحكة

ضحكة عبيطة على وشك و إنت بتتفرج على فيلم رومانسى تتنطط قدامها طفولة الدنيا و عنيك تبربش فلاشات بصور تانية و بتربط نفسك بدوبارة علشان ما تطيرش و مع تتر النهاية بتجيب دبوس من روحك و تفرقع كل البلالين.. ..حالة ناس كتير بتعيشها

قلبك رنات

بيضخ ف دمه ساعات
و بيفصل شبكة
يقول صدعت من الدقات
و ساعات بيحب يغير رنات
واقف ع الناصية قصاد منه
حريف نغمات
كل ما بيقرب من جنبه
يلاقيه بيلق
زى اللى مخاوى
و بيرقص تعابين بصاجات
يتلخبط رسمه على البكرة
و خطوطه إشارة
بتهنج
بتحاول تمسك ف الشَرطة
يتكهرب فولت على الهادى
نفسين و يلمسوا دخان
فا سرينة إسعاف طيران
و يقولوا يا شاطر
رخصك دى قناطر
إركن على "منيو" الشاشة
الروح عطلانة
و النبض عايش لك كماشة
شمر كمين أعصابك
و إشحن لك كارت يدق
و تعالى نزق

عيد

هدمة جديدة
و أنا قلبى شماعة فاضية
فردت ضلعى ألبس و أقول يا حياة
رفرفت زى الطير
جناحى كان حافى
فك الشريط الأبيض من على كتافى
شبكت هدومى ف السما
رهنت شماعة الهوا لإديا
شاورت صبية
لم الهوا هدومه
سافر وراها
و قفل عليا

بيت

هدوا الطريق و البيت
و يا زنقة المسافات فيا
على معبرك مليون طابور
ف قلبى نط السور
مقفول قصاد مقفول
مفتوح ماسورة بندقية
عديت لباب السما
و طابورى ف إديا

كشكول

كشكول قديم
بينز حبر أحمر
كان قلبى عامل نضارات سودا
و مستخبى
كان حلمى جمرك
يا صبرا
يشتاق لدمعى
هربت منك
حسبة سنين
غصنين زتون ناشفين
و كل ما يهج اليمام
بتموت عنيا و تنطفى
زى جثة طفل مادد اديه بيشد المطر
ﻻ اديه بتوصل و ﻻ جدره بيشق الحجر
... ؛

فاتورة

الزوايا مشفرة الكادر
و مقيدة الكاميرا بقماش
صعب جداً
تنطلق من بين شفايفك
ضحكة فلاش

زاوية "فرج "سنتها مكسورة
و العاج طريقه إتزنق
ف مسيرة معصورة
غسيلى نقط سمك
و المية محسورة

محشورة إيدك ف الدعا
بتضيق البيبان
تخطف حدادى الروح
الغنوة م الغيطان
    إفتح
خبطتين و إفتح زمان
سمسم يا عم بلاش جنان
مش ناقصة تتنيحة بيبان
زقيت و نص كتافى ورمت
و ندهت لما جيرانى صحيت
__..👮;
.. إضحك بقى يمكن ده عدس
أحفر يا أفندى من تحت شق الحيط
تعدى
و بلاش تدوب ف المصدى
لم الشبك من نيلك المليان سكك
و إعزم لى حيلك ع الدكك
إدفع يا أفندى
و إن حد سألك   فاتورته عندى
ــــــــــــــــ

قشة

حطيت القشة
على ضهره المحنى فوق الشيلة
و إستنيت
يمشى ورايا لحد البيت
رفس القشة و جت على غلبى
قطمت قلبى
وقفوا دقيقة يكفنوا فيا
أكلوا عنيا
و لموا السيرة
و كمان أخدوا معاه تصويرة

مسحراتى

مسحراتى
بيصحى نور مقطوع من الخضة
ف يجرى ع القلة يشرب
و بلة صوت
تبدر العيال بلكونات
بتمطر أساميهم للطبلة
ضى ملو الشارع سيمفونية
إصحى يا عبد الله
يا عمو أنا أحلام
إصحىِ يا أحلام
يتفرج على زقزقة الفرحة ف عينهم
شربة يا ولاد الحلال
يرفع ف ريقه
و نقطتين يودعوا ب خبطة "ميكروفون"
وقت الآدان
يا حى يا ديان
الصوم جبين بينقط عرق يرتوى
و يوحد اللى لرزقك يحتوى