كل الصور بلمت

كل الصور كانت
 متعلقة قدامى و انا بارسمك
 و اما رسمتك حياه كل الصور بلمت
بتحبى نلعب أم و أنا عيلك بكاي
داهنة الحيطان ضلمة
و تعيدي ف الحكايات
لا انا لاقى علبة بن لأجلن أفوقلك
و لا شايف المناديل
تسقط دموعى لفوق

دعوة ورا دعوة
من كتر رفع الايد الصبر جاع مني
و الجوع يمطرنى
نقطة الجوع اللي تنزل تقطمك يا اجدعها عيد
مليت مشنة عياط
حوشته تحت الباط
شنطة سحاب اسود
ركبته فوق البحر
مداين جوع بتتغرب

قام ملحي زق الملح
 و البحر غرقني
فتحت عين ع ال فرن
مخبوزة لقمة عيش
و التانية بين الشيش
شايفة رغيف و شاويش
ع الأرض طين و استوى
ع الارض طوب احمر
بينز لون أحمر و لا بيبنيش
كل الصويت تحابيش
زحلقت قلبى ف قلب توكتوك
و قلت يلا نعيش
لميتى كل المطر خرطوم و رشيتى
السكة متدغدغة و هدومى عكيتى
#إيناس_البنا