حضن شمعة

و تحضن شمعة فتقولك حشايا معاك
يدوب قلبك /تدب الولعة ف الأملاك
و تسرق يا ابن عم الليل /شربة مي
أبخ المية على ريقك
برعشة روح /تخطرف: حي
يكون شمعك غرف منه حريق و سقاك
... #تخاريف
إيناس البنا

غزل قهوة

و أحب القهوة مغلية
تخبى وشها فيا
يا سكر قلب و صغير على العناوين
فاضل تلقيمة ويكونلك يا واد قيمة
فيحضنها الخزف روحه ترد/ يلين
 ألف البصمة تحيينى
ب طرف شفايفك الصينى
و أدوق بشويش
يمرجحنى خيال الطيش
غناكى يا حلوة يشجينى
#غزل_قهوة
إيناس البنا

نوم

لمى كراكيب دماغك من هنا
ده أنا اللى بأقول
لسة فاضل أغنية على لفة الشريط ها أسمعها و أسلم نمرتين ها يدقوا مسمار ف التابوت أبو بطانية / امبارح كان حلم بينط لورا نفسى ف مرة يشدنى لقدام ..أيوة تمام .. نسمع ها أقابله بكرة قبل ما أنام ..ده جوة اللى بتقول ...

#خطرفةنووم

اليد العليا

اليد العليا لا تعرف أنى أبحث عنك
فلا تقرأ جرف شفاه
ألقيت منها بسمة طازجة
هى ابنة سفاح
من لحظة عبثت بها بعض بذور قرنفل
برغبة فنجان أحمر
فكان الليل صرخة ميلاد
أنفث أدخنة الكوب الحار
فتنزلق بحبل سرى على شفتى
تتلوى
و أفزع منها
ألفظها
أخفيها بفنجان مقلوب
فتأكلها آثار الرائحة
و لا تراها
....؛
إيناس البنا

الأب و الجونيور

الدم بأولوية الحصاد
فلا ترتدى عباءة الأب و الجونيور
الديب الجوانى مسلسل لكن
سلسلته طويلة
بيصيد أفراخى و أنا مغرم بشواربه
الديب البرانى م الجوع ساعده
قاله اخشع يا خفيف
الجو ده ملكى
و إن كان ع القسمة
جهز ولعة
وها أبعت لك يا أسطى المصاريف
....؛
إيناس البنا

ختم الدولة

على ختم الدولة مسموح لك روحى مقاولة
و الأخ ملوش غير هدمة أخوه
لون الشربات يا محلى
قلبك مستورد صينى
و أنا عايش نكسة مع اللى جابوه
.....؛
إيناس البنا

تنفيضة مخدة و برواز

جوة المخدة فاتح عتاب
شباك صغير كان خرم باب
بتبص له من قلب يدى
كام روح ف ليلة تحلم تعدى
ذنبى أنا كل الغياب
على عمر تانى حلمت بيك
نطيت لخوفى عملت عتبة و سلسلة
قفلت كلمة قصيرة
و سؤال يتيم
إزاى تشوفى ؟
طب ليه كفوفك زقت سلام ؟
لمى الكلام
إمشى بأستيكة و كابوس ورا كل تغميضة عنين
إصحى بقى/ شالوا الصوان /خلصوا اليومين
و مخدتى طردتنى بره
ضمت إديا شريطة غامقة
و نمت واقفة ع الحيطان
و أنا من زمان سيباك تخانق فيها جوة
......؛
تنفيضة مخدة و برواز
إيناس البنا

فيلم ساعة و نص

مليانة عينك شتا جواك سما و أرضين
أرض  اللى راح و اللى جى
وقفت / بينهم وابور/م المحطة ركبت
خرط العرق قلبك/ زهقت
قزقزت عمرك صور يا ابن الأسامى المقهورين
من ملح عمرك عطشت
" و إلى التراب نعود"
كل التراب شايل دعا بالمطر
محتارة فيك المية
تبخل ببلة ريق تحدفك على وش دنيا
لاجل تركب م المحطة التانية
و ف فتحة الشباك وقفت
منزاحة روحك ع السما / بتجرى ع القضيب الحى
بتشد عواميد النور
و لا يقربوش
تحس إيدك هاموش
يعلا ع الصفارة صوتك
تلقط الصورة موتك
بايشة ف اللقطة الوشوش
يا ابن الرغيف الني
حصلت آخر محطة لدمعتك
وصلت لجنتك
و كشرت فينا السنين
وكل اما يعدى قطر تاني بيحلف ع الرصيف يضحك
....؛
إيناس البنا

مشيك فرض

يمكن ف يوم تبقى كل الصورة عتمة
و إنت مشيك فرض
الضل لك تابع مديت إديك تحضنه
حضن الغروب شمسه
و بطول جناحك فرشت الأرض
.....؛
إيناس البنا

كوتشى .. أحداث ملعب الدفاع الجوي

ممكن حد يجيب لى الكوتشى
يعنى ها أروح حافى الليلة
يا أمه بلاش تاخدى على خاطرك
أنا مش عيل بس حاولت ما لاقى الحيلة
نفسى أشوف الملعب الأخضر
انا مش عارف اقرب اكتر
صاحبى ماسكنى
صوت بيحوشنى
بأبص لقيت الضلمة اتفردت كل الصورة
عايز أهتف مقفول بقى
عايز أروح / خايف أقولك
إوعى يا غالية تزعلى منى
أصلى ها أسيب الكوتشى بدالى جنب الملعب
و أنا راح أروح من غير كوتشى
.....؛
إيناس البنا

فطار

على وش فطار 
تسقية عيش بحليب /بضحك عيال
فتافيت الشمس  بتدخل و تزق الشنكل م الشيش
و اما بحاول أمسكها بتهرب تعمل جناحات ع الحيط   / و تعيش
ورنيش الحيط زجزاج صاحى 
بيلخبط صوره / حريف حواديت
و بيرسم شجرة جوة البيت 
أرسم عصافير  بأديا
ف يطير الريش ف عنيا
تبربش ضحكتى فيا
تجرى الضحكة تقول
ها ألحق غنوة لبياع الفول
ما عرفتش و لا مرة أترجمها مع إنى ف قلب الغنا محشور
قلبى زمان 
كان عصفور غاوى النخل 
و البلح أحمر زغلول
 بالنوى يحدف قلب الماشيين
بره الشيش 
من غير مكياج و لا كرانيش
روحهم تخضر
....؛

إيناس_البنا 

توب الورد

كان نفسى ف الجناحات و توب الورد
قفلت شباكى
ولبسته شوكنى
كان بامبى و بكرانيش
لفيت و لففنى
قدامى قرعة عسل بصتها تعرفنى
مسكت إبرتين تريكو ووقفت قدامها
"مينى نيمينى نيموو"
قلبى كبر و إتشق و هى لأ
و لا مرة تتحول و تاخدنى للأساطير
شكلك يا سحر بخيل
الشوك دخل جلدى قلعت التوب
و شبطت ف الجناحات
نطيت جوة المراية و رسمت ع الصورة
دايرة بلون أحمر جواها عصفورة
.........
إيناس البنا

علمنى

علمنى لما يغيب
بيبقى إحساس مش غريب
عادى يعنى ساعتين زيادة
بعد وقت يمكن و جايز يكون معاده
علمنى أنسى كل حاجة بتضايقنى
و معاها جزء من كلمة واحشنى
و لما يخرج
يخرج سؤال من غير عنين
تايه ف كلمة رحت فين ؟
و أما يعود
يمسك ف أستيكة و يمسح الإختيار
بين ب و ج ف خانة الأجوبة
يفضل أ معناها أيوة إنت هنا
و لا كنت يوم ب يعنى بره
و لا ج جواب مش عندنا
علمنى أفتح كلمة و أقفل طوق شفايفى
يمسكها و يقول كل حاجة ممكنة
أسكت و أزق ف صوتى من صف الرفوف
أفوق لبعترة الحروف
أنسى مكانها
و أصدق إنها
كلمة و ف روحه جمالها
......
إيناس البنا

صور من غير دبرياج

الصور مطلوقة من غير دبرياج
على زحمة السكة
بتعبى روحك نَفس
عداد دخول الهوا خرف
بيعد ف الخرطوش
تجرى بسرعة كام جريح
و تشدنى جنبك
جايز نعشق دمنا قضبان وصول
....
إيناس البنا

صحوة

يعنى عارف لما بأصحى بدرى عنك
 و أعمل الحركات بتاعتى
الجاكيت ع الكرسى جنبك
و الإيشارب ف ضلفة بره
لما أجيبه ألمس صوابعك
تبتسم لى بنص عين
فاتح دراعك صفحتين
تنده حبيبتى إنتِ فين ؟
ارسم لك الصبح بروحين
بلون شفايف ع الورق الأبيض
الصفحتين
و شهقة من برفان لساه مغمض
ع الشتا جوة الهدوم
أيوة بأكون متقصدة أقلق منامك
و امضى على دفتر صباحى بدقتين
......؛
إيناس البنا

سماء ممطرة

النافذة  ترفض  الصحو 

تتثائب

تبدل بعض سماء  زرقتها بالبحر 

فنكون كائنات عائمة 

نحن و الذكريات الملونة 

ذاكرتي تحمل شراشف من لون الماء 

كالأجنحة   فأرتديها كشراع 

و أترك الأسماك للصيد الجائر

القطط فى شتاء آخر 

ترقب بحر الأعلى و تخشى مأساة المطر 

و قبل تزاحم الغيم فى أردية الظل 

تتساقط القطط الراحلة من أعلى

و تقف هى الفتاة الحائرة بين الماء و الأجنحة 

تلقفها كمن يختزن الماء براحتيه

يسقط كل مواء وحده مفلس من أكواب الحليب 

هى زائرة اليوم العائد 

تائهة سبيل بلا أوراق نقدية 

مكسوة ب فراء جائع

تستجدي السبيل منك 

و انت ساحر العصا المجوفة 

تنفخ فيها فيركض النباح و الرعب

يتلاشى اللون 

و بين فكي النباح تتساقط الأرض داكنة و يتمزق مواء المطر 

.......؛ 

إيناس البنا

جبين

بسم الله
نزعت أقواس جبينك
و ضجيج الأبواب السبع
صعوداً من باطن أرض
لبدء زفير من شفتى
ينسكب فيك أم يختار الكأس
لا فارق
لكنى لا أظمأ لك
يحتال الكأس
قطرات من الشراب العاشق
تقذف الواقفين
أصحاب الأردية البيضاء
فيحيلهم أشباح بصفات الليل
كزبد عائم
الأشباح تخفى طبقات المطر لتحيا
و أنت
ما زال وجهك عابساً
فارفع خطى الحاجب
لدرجات الفزع
و سأتلو عليك صفقات الضحك الممتد
لاحقاً ربما فى سماء أخرى
....
إيناس البنا

قهوة

القهوة لا قلب لها لكنها تهبك دقات تصعد لأعلى الروح / تنطلق تناديها فلا تعود / تجرى بينك و بين طبقات تخرج منك / تنتهى الرشفات /فيكون أنت و قلب هناك و بعض تجاعيد الجلد

على سيفى بأنام

على سيفى بأنام
و بأحاول ادبح جوز احلام
الدقة بتهرب و بأخاف النومة تجيب آخر
و لا عارف م القلق اتاخر
أتشهد
ف تفرمل فواتير الدوخة
تتلخبط إمضا على الصورة
خط طويل مش رسم كلام
و أدفع للهوا عربون ل خصام
....
إيناس البنا

شيكولا

الشيكولا عندما تكون وحيدة
تثأر منك
فتصيبك بهزة قلبية
تشهق
يتصاعد غاز الشهوة
لبداية لقاء حار بلا عينين
يهتف زائرى البندق
أنتِ لى
أصنع من أصابعك طريق
لا رأفة بى
و أنتِ الليلة بلا رفيق
سواى
فلنرقص معاً
روعة الشيكولاتة
....
إيناس البنا

رباعيات عن العشق .

العشق ورطة أسامى هربانة م الجهادية
اسمى ف الكشف سامى و الرمل حالف عليا
سابنى سنة خيال ف بلاد تركب الموال
سكنت ف سيرتى ربابة و الحنة ملخت إديا
....

العشق شابك ف عروة كمى و متبت
فكيت غرزة بضوافرى و قلت يتفَوت
مسكت إديا الخيطان لضمتنى ف الإبرة
لاقدرت أعدى أخرامها ولاعارف أتقوت
....

العشق كان رجلين يتمشوا ع السكة
عزم الهوى بصورتين و شجر و كام دكة
قاسى اللى دق التلج جوة اللمون و سقاه
عدى حكيم الاسنان قاله الغرام .. وعكة
.....؛
إيناس البنا

قلبى كراسى مطَوحين
و إيديا حلفت ميت يمين
ع الصبح يطلع من هنا
شبيت لفوق
يمكن وقعت
بس سبت عنيا بره مفتوحين
....
إيناس البنا

رباعية خبطة جناح

مستنى خبطة جناح و ف قلبى رعش خفيف
خربشت كارت تاريخ بجنيه و قلت أضيف
بأجرى ورا المكتوب نضارتى حيلها إتكسر
حدف الزمن دوقة و رمالى نص رغيف
...؛
إيناس البنا

لفى بيا

لفى بيا كمان معايا و أحضنينى
ف السحاب قطن و مطر إبقى إغسلينى
فرقى لى الشوق بضحكة نغبشى لوح القزاز
ف الهوا كام غنوة طارت بلى ريقها و طلعينى
....
إيناس البنا