حلقان

من قلة الالوان غطوني بالحلقان
شخللت بالجتة
رقصوا ورايا العيال
موال ورا موال
حلوة الخريطة محزمة م النص
لابسه حلق فالصو و بتهز ف الترسو
طالعة المشانق هنا طالعة المشانق هناك
مسكوا اللي لابس هدوم
كل الكبار و الرجال
حتى اللي لابسه الكابوس و معدي وقت النوم
طرح المشانق هموم مكتوبة ع رقاب العيال
واقف التاريخ زنهار لابس ميري
بكرة العيد .." بنغني للشنق البليد "
سلمنا ايد ورا ايد
للكره غنوة ..  للحب غنوة
"والحُب يحيا رغم أنف القافية "
نحط الغنوة ف الغربال
"تُساقط منها الشعوب الحافية "
شخلل يا ويكا و ارقص كمان
و اشرب كاسات الضلمة "سِك "
نص الخريطة الناس حلقان
متخرمين و رابطهم سلك

#إيناس_البنا