عتبة

_ _ _
وقف كل كلام ع العتبة
مش محتاجة عناد و خصام
أنا قدامك فاترينة
و توب أبيض
إيدى تقيلة و إيدهم خشنة
و اللى حبيبه بحكم العشرة
بيقومنى
و دموعهم بتغسلنى
إدخل إلمس جلدى الحى البارد
يمكن نفحة روحك
تقبلنى
ضيف على حلم
أفهم منه سبب البعد
لكن يا صديقى الجوانى
هلال العمر التانى هناك
بيفهمنى إن الأسباب
زعلت منى
و لا عادت فواتيرهم تخدمنى
الأصوات مش راكبة على خناقة
ده صويت ميت
يا آبا تعالى
و حضنتكوا يا ولاد بعنيا قبل إديا
زحمة حارة ف عفشة مية
زقزق فار نطوا الرجال
فضوا الكوكب من حواليا
.........