مكتوب ع الورد

مكتوب عليها تتعلق ف الحكايات
من أول الجدر ف دقة الهون و المغات
لطلعة الغصن و الورد زي لون البخت
صابح ساعات / كتير أبيض
و لما تقطفه يدمع
و لا حد مرة يقولها إنه بيندي
الورد متصالح مع الوقفة على طرف الهوا
شرطه لما يسيبها يشبك ف شعر صبية
ف شعرها هي
و تلف الحكاوي على زجزاج الضفيرة
زجزاج بيخبي شوك الورد
بتحكي
و عيون سولوفان بتشف روحها
ف الرمشة بتخبط على دستة قلوب
تفتح
ف تجري تقفل الشيش
و تضم ايدها ع الوردة
تحضنها و تمطر لها علشان تعيش
و ف قصة تانية تدعك عنيها الصبح
شمس
الضي فيها يغلب النظرة
تفتح الزهرة / جناح
تطير
تخبي القصة ف السماوات
تضحك النسمة على شوق البنات
تهز الشجرة ف تمطر ورق
بيمسك الورق ف الحبر و يسمي 
وكل اما تكتب تتغير المرايات

...........

إيناس البنا