يا بلدنا

قلبك المليان ياميش كان كبير و لا حبنيش
قلبى عايش ف القريش بفرم الاسفلت عيش
لو اصيله شيلى زلطك م الخميره
قصدى يعنى سنانى متقوليش بايعنى
ها ابقى رايح جاى اغنى
دلعينا و فخمينا و ف عصيرك فخفخينا
ندعى و نطرقع ادينا
بس لمى قشر موزك يا عظمتك لتزحلقينا
....؛😂
#إيناس_البنا

مولد

و آدى منحة مولد يا مواطن
مية و خمسين آهية يا افندى
تاكل بيها حتة ملبن
اللوز و الجوز تقليعة لاوندى
طلبك عندى
غمض عينك تاكل ملبن
نص الفتحة بقرش حشيش
تفتح خالص راح الفالح ف طابور عيش
 يا حلاوة المولد  ب صوان و افيش
و بطولة ذواتى عروسة كنيش
طعمها  ماسخ
كان القلب العيل بيلونها دواير
كبر القلب و خبوا حصانه
آخر مشيه ف حلم كعابه
بقى حرافيش
يا حبيبى يا كل حلاوة الروح
مشتاق طلة
مشتاق غيمة عينى تمطر
 يملا السكر جوفى بقربك
يسجد تحت القبة الخضرا
و أخرج بره شقوق الخوف
كل الشوف يتغمى بنورك
نفسى أجيلك و أرمى الطعم و كل الشوف
#إيناس_البنا

فى المقهى الخامس بعد المائة

فى المقهى الخامس بعد المائة يسخر من عبوس عينيها الممتلئة بخطوات قصيدة 
لم يترك الرفاق يوما لأجلها و تركها لعبث مرآة تطلق للحمرة شفاهها فتركض خلفها الأنا الأخرى تنتحر عليها  ثم تصيدها أنسجة ورقية 
ما كيل المقدار الشائع من أحمر الشفاه لاستنبات الشهرة 
ما كيل المقدار الشائع لاستنبات الشهوة 
يحمم نرجيلته و يقضم شفاها العائدة من اللهب يبحث عن بضع خطوط ملونه لإحداهن تغويه كسحب من جسد أبيض كى يتطهر من إثم الأحلام 
و انا أغوى العطر ألقم ثديي حلماً ثم أنام 
فى ليل عائد بعد الألف 
 للفراش شهريار آخر يحكي عذرائه كبضع كلمات قصيده لا يتركها تنضج كامرأه فأخط جانباً بالحائط أبناء الوسادة ثم أسقط في الموت المؤجل قبل ان تأتي الشطره المناسبه 
يتعالى شخير من سطر ما فتنتفض شهرزاد لثأرها كأن الفجر الذنب السام لعقرب الساعة 
الرعشة تعنى سريان السم 
الرعشة تعنى هجران النوم 
#إيناس_البنا

اللقمة الكلمة

اللقمة الكلمة بتزوغ ف الزور
 ع القصبة تلف / تدور
يمكن لو شدت نفسين تترد لها الروح
تشرق فيها ف تطلع من عينك تتصور
#إيناس_البنا

كرش

المعنى ف بطنى
و انا كرشى كبير
بيلقط كل العصافير
حتتك بتتك
اصل انا فاضى
كل ما باكل باعمل قاضى
هل النسيم و التانى و انت ع القهوة
كان لك ف جوفك قلب واستهوى
و تكح من غير الكوفية
المشنقة
افهم بقى
دوا العليل بالهوا
كل الهوا تسده
#حتة خنقه ف لقمة
#إيناس_البنا

كوورة

باصى يا واد يا ابن الايه
شوط الكورة بعزم ما فيك
يااللى معاك الرايه يا بيه
شفت الخط بلنتى عليك
حلق ع الكورة و فوت سيب الضي بشوقه يموت
فيه كشاف و اتنين و ادى خمسه ف وش النور
 قفلوها ولاد اللعيبه
حطوا الشبكه بره السور
..😉..؛
#إيناس_البنا

عزيزاتى" الفريندات" أعزائي "الفريندين"
صبح "بونجور" يا بشريين
ب نسكافه و خرطة كيك
بتطلع كل طراطيرك
تغنى لك
تعالى يا حلو و انا ادفيك
😉😀

سؤال و جواب

سؤال أحمر
مين اللى دمر فرحة المراجيح ؟
.......؛
شوية طول مع المتخبى تحت الهيش
ِِِِكِبِد و عنين و كسرة ريش
زمان خفت البساط ليطيش
يلف بلاد صور و سنين
يقول تقلتنى يا تخين
و يلقى لروحه من بعدى علاء الدين
......؛
السؤال ل يوميات رجل بسيط
و الإجابة ل إيناس البنا

صباحك نور

صباحك نور
و انا قلبي دواية ملمسة ع السور
بترعش
ف اللى صاحي مني بيزغلل يكعبلني
ماتش بيني و بين عنيا
كل لمس كتاف بتنطر قبل عد الفورة ليا
و اللى نايم مني نايم مش جعان
رز رايح رز جاى
و الملاك يعرف يعدي
مالوش ف تتنيحة الحيطان 
لف اللحاف زهقان 
لف يرشي ملاك معدي يشد فيشتي
#إيناس_البنا

صباح ميكروباص

صبحت بأطرقع الفكة على العركة
رايح مترو ؟
..مانيش رايح دانا مطبق يا بلدينا من امبارح
ادوس بنزينى على رجلى و اسوق فيها العجل طلقة 
ورا كورة  بتتحدف على الموقف
كور بيضا تلف و تجرى ما تفرملش
فبتعلق فشر بللرينا بره الباب
و لاقط زى طبق الدش
 " ماسك الهوا بإديا "
و عنيا /دخلها تراب
..صباح الفكة مين مادفعش من ع الباب ؟
😂 صباااحو
#إيناس_البنا

مشوى شفايف

و احب إشتياقى لنقطة ف اديك
فتحضن عنيا
تسلم عليك
يا منبت ف شعرك سايبنى مواسم
مخاصمنى زرعى ب امطر طلاسم
بعودة وقرب أوصل سلامى
يا نفسى المسافر بلاد بين كتافك
ها أصالح صوابعى
ع كورنيش ف ضهرك
تقرب تأنكج
و مشوى شفايفك
نشوف الربيع  ف عز الشتا
ف أصبح و أمسى
و أحس النهار كان له غيبة و فجأة  طلع لى هنا
#إيناس_البنا

ملح ع العتب

و تلقى الملح بيبطن عتب روحك  / يا بتصدى و تتاكل برغم انك ف صلبك حي  / يا تقلب جيفة و فسيخك يلف ف زنقة الأعياد يشم الضحكة و يقرقش بصل ال ولاد / يا اما تعيش تزق الأرض بعصاية يجوز تنشق لك مالح يلم ف عتبك الكالح      يكون مينا
#إيناس_البنا

زمان بلكونات

زمانها ف بيت الزمان السعيد
دماغها تروح كل صفحة م الكتاب
ف نور من بعيد
ل شيش مش موارب
كان له ولد لمحت عنيه من غير قميص
و ف صدره كورنيش
نطرها الرمش موجة ع الهوا
و النظرة منها بحلقت
بس اختشى لا ما باختشيش
مرة كمان
صفحة كتابها ابيض دق الكلام منه على القلب الكنيش
و يحب ضهر الستارة انه يمثل / فتحة م خرام  البيبان
و يخبى  ننى مستوى ف زحمة نقوشه
داخل /  ها يطلع
و الستارة .. جنية ساكنه ع الهوا
مين فينا مطوح دى هي و الا انا ؟
اول ما بتنور له اوضة
فلاشه يلقط صورة البنت الستاره
لو ينطفى تغطس دماغها
و تنام شتا جوة رجلين سقعانين
عدا الشتا
و ربيع كمان
لف الزمن / وقت الخريف
بصت لها الساعة
كل الصفح دبلانة
و لا يوم عرفت ترجع الحرف اللى نط م الكتاب
و الوقت ليل عطشان مية عنيها
و الليل ديابة كلت الستاير
البلكونات من ألف ليلة فكت ضفايرها الخشب
البلكونات سلك و حديد
جم شعرتين شايبين شدوها من ع الحيط
كل اللى فاضل م الشتا لحافين
كل اللى فاضل رجليها اللى لسه   سقعانين
#إيناس_البنا

زوفة ليل

ف زوفة ليل بتبقى السيما جوة الحيطة منعانى
أبربش يمكن اللقطة تكون مش هي ف تغير
 ده عيب ف العدسة و الا الكادر جوانى
و أخاف أنزل ف قلب الليل أزود عتمة السكة
عشق الحيطان فاجر بيحاوط الجتة
و الكاميرا وسواسك تدخن و تلاغيك : طب بس موت انت و ها اترحم عليك
#إيناس_البنا

وعد

فيه وعد زى الحلق
ووعد لف اتزنق
شقيان يا قلب الولد
و اما تلاقى الوعد يقول دا ريحتك عرق
#إيناس_البنا

صورة لصغيرة

هى صورة لصغيرة تشع بياضا بضحكة ملونة
 أنت تغنيها ملاك
و أنا لم أك يوماً احب الأطفال الورقية
و لم أر الملائكة من قبل
أعشق صغيرى
أهدرت قلبى بروحه
ألعقه ثم ألثم قطط المنزل جميعهم
#إيناس_البنا

هى و الزيتون و سلاما فلسطين

هى رائعة
تمكر بالحزن
فتنزع عويناتى الطبية
و تلصق عدسات مرنة
 الآن نخرج معاً
أكره أقدامى الشائكة
فتصب أكياس الفوار
و تخفى مشابك الشعر
 تتسوق عارية
كى لا يخبرها أحدهم أن ثيابها رديئة
هى تحب الزيتون
فترتديه من الأرفف
و تحمل الأغصان كي يعرفوها
لا تملك رصيد إئتمان
و أنا أنتظر بالخارج
لم أبتع شيئاً
و لم أعرف أن المتجر
قام بتمليحها
#إيناس_البنا

لو ابويا ف يوم يغيب

لو ابويا ف يوم يغيب
رن و اسأل
دا انت منى مش غريب
لو تقرب او تشوفنى
تقولى فينك ؟!
مش بعيد انا جنب عينك
بس سيب العين تحاول
تبقى وسع الفرق فيا
فرق طولى
او شواربى او اديا
و افتكر من مرة فاتت
كنت اقصر
كنت ضل شفايفه باشت
من بل ريقه
كل ما يجمع ف سطر
التانى يكسر
زق قلبى جوة منك
تانى ليا
فيه سؤال حيرنى فيا
ليه ف يوم بنوتة نزلت م السما ؟
كل اما اشد لحاف ف حلم
تسرقنى هي
يتسرسب اللحن الرقيق
من طوع اديا
و انا مش باطيق
القفلة ديا / حطان و مية
سقف الأوض فيه بنت واقفة له بشاكوش
ابويا كان    يقدر يحوش
طولت عنك
و كل ما يطول غيابك
ترن تانى
تقولى فينك ؟!
#إيناس_البنا

صورة بالمقلوب

بلف السور و بتعاجب
و كل ما احط ايد ع الطوب
ألاقى الصورة بالمقلوب
انط و اقول راح اصحى و افوق
اشوف واحد هناك شبهى
بنفس الهدمة و الاغرب.. باصصلى فوق
#إيناس_البنا

غنيوة

كان حلو طويل و بزلومة
ف خدوده الرمل و بيحاول يشرب م النيل
شاف العركة ف بيت الزغاليل
بين الصياد و الخلق كتير
زق ب ريشه ف حيطان الليل
بس المنحوس معرفش يطير
شفط المرسح جوة التغيير
و ترابه ال ياما كتم نفسه
و عشان يمسك ف الهوا من فوق طوح باديه
هس و آتشو
عطس المذكور و الكادر عويل
حدفه فلاش باك غرقه ف النيل
طلع المرسح اكبر بكتير
#إيناس_البنا

طنط ضنك

طنطك ضنك
كانت تنده ع الحلمين   بنص فرنك
جت قدامى قالت لى يا حيله
انت وقعت ف بختى الليلة
سألت يا طنط الحلم ف حقنة و الا ف ماسك
من بعديها طنطك ضنك سابت زورها معايا و فوقه.. نص فرنك
#إيناس_البنا

أنت و العشب

انت تفترش العشب
الهواء لم يكن يوماً عطر أنثى تشتهيك
جسدك مأدبة لحشرات تأكل الضوء
أنت لم تعرف الضوء
و لا تؤمن بالحشرات المنتحرة
فقط تخاف العثة
كريات النفتالين مناسبة
كحشوات للشعر و الأهداب
فأغمض عينيك
لن تنزعج من دبيب النمل
هو يبحث عن سليمان داخلك
 انت لا تملكه
فلا تهتم
ذاكرتك تساقطت تروى العشب
و دماؤك تخثرت كخزين من الزبد
سيأكله أطفال الشتاء يوماً
الآن أظلمت الشهوة و الخوف
الآن عرفت الضوء
#إيناس_البنا

متعبة

متعبة
المسافات تمط جسدى بالرحيل
 الشهيق عمق شارع
 المرآة متعة الوقت حتى يعود الدم الفاسد
و المضخة تعشق التسلية
فتقذف حقائب نظرات للزجاج اللامع
هذه نظرة تحدٍ و أخرى تعنى أنك أنت
أما تلك الآتية تتلوى
أرتديها
فتحمل المرآة منى طفل سفاح
الليل بلا تثاؤب
أفتح فمى عوضاً عنه
فأتقيأ الحياة و أراهم
فى ذاكرة الأعياد
المصلين همزة ترسم ال أنا ملونة
تحمل شقائق أغطية الرأس
و جوارب الفوال الضاحكة
ثم أنا صندوق أسود
أحفظ الحكايا و لا يراني أحد
بالخارج
يتعثر الهواء بمطبات الشارع
فتتبخر الذكرى
و نظرة أخيرة للمرآة
نظرة ذئب أبيض
يقتل طفلي ثم يغمز بعينى
فأعود
#إيناس_البنا

علب

رايح و جاى ددبان
م الحيط لباب البيت
الناس علب فاضية
و انت البعيد مليان
 لحد ما اتكبيت
#إيناس_البنا

متلخلخة

متلخلخة كل الاغانى
ع الصبح يا ابنى مالكش صولو ف لحن بايت
و أرجع فلاش
كنت ع السكة بأغنى للشوارع
" يااا اصحابى يااا احبابى يلا اصحم
الجرس بيضرب ديم دام دوم "
ركز كده
حتى الجرس عايز ينام
واقف الطابور
مدرسة صفا
مدرسة انتباه
غير هنا  طقم  ال ودان
يا مثبت الرجلين كل العيال فناجين
متشكلين م الطين
يتلف و بيتحرق
و اما الاغانى تسف و صوت الجرس يخنف
كل الطابور مكسور
يا نعبى فيك المر
يا تتشرخ ع السور
و اتلخلخت فيا المعانى
رن الجرس
ضميت ضنايا و نمت تانى
#إيناس_البنا

نص الشتا

نص الشتا قلب ف ساعته و قال
- - ليه صاحية  بدرى يا أم الخال ؟
نص الهوا طار جوة حلم بيستخبى م المخدة
و ف فرو قطة نايمة المخدة
نص الشتا كل اما ييجى الحلم يتخربش
- - سيبك من الخرابيش
- - مين دوب السجادة تحت الشيش ؟
#إيناس_البنا

صبااحو

أخرى

نوافذ القمر
و الهالات المبعثرة
تنهى صافرات الحرب
و قذائف  النهار
أحمل صدعاً برأسى
تثب الأخرى منه
للخارج
هى لا ترتدينى
و أنا أتغامز عليها كلما مرت
أحتك بها .. بى
فيتطاير بها الشرز و بعض الدم الساخن
هى لا تبتعد و أنا لا أقترب
#إيناس_البنا

موسم يفط

و ف موسم ال "يفط "
مدقوق ياعرق الخشب ع السكة تتمنظر
ف العالى ماسك يفط بدل الورق الاخضر
#إيناس_البنا

صباح شيكولاتة

صبح الصباح يا جميل قهوة و شكلاتة
كل اللى شافنى يغير و انا ماشى بألاطة
قبلتنى بنت الإيه تقرا لى فنجانى
قلت لها خط الغرام داخل على خياطة
#إيناس_البنا
😄

أغطية و فراش

أغطية الفراش أفواه جائعة
آكل فى الليلة بضع عناقيد
و أرتج حتى مخاض الزبد
فأصنع حلوى و قناع تنفس
ثم أزهد فيها
فى الليل أنت مخدعى
فلتصبغ قلبك بالفضة
لأرانى
#إيناس_البنا

بدل أوهام

و  ف إسمها يدك
 بتبعدنى
رجعت سنين ليوم شبهه
 معاندنى
لا انا عارفة أنفض قلبى و أتاوب
ألف و أنام
و لا هاين سؤالى يبيض الكدبة على لسانك
و تشكى لى برئ حالك
ف تصرف روحى م الدنيا بدل أوهام
#إيناس_البنا

عبد المعين

يا عبد المعين ما سايبك تعين
تخلع ضروسى الشمال و اليمين
يسهينى سوسى يطير جوة بقى
اقرقش وافرفش و اقولك آمين
#إيناس_البنا

شفاه و أنوف

شفاهى المطلية بسخاء
أبواب العطر المشرعة
حقيبة يدى المحملة بأنوف لآخرين
و أنفى المحدق بالهواء
يفتقد الورد
يبحث عن بتلة تركها عقرب الساعة سهوا
بضع  تكات  لا تشبه لوناً
ثم لا بتلات أو صخب
فقط الخريف و جنياته العارية
الليل لى
أتحرش به
الموسيقى توقظ الدرج
تصل لخط  ال" سي"
فيشكو الشارع حجرته المضيئة
#إيناس_البنا

هو و الحلوى

هى تعرف الحلوى بأعواد الأسنان الخشبية
حلواها جميعها تحمل تلك الأشواك
 بجيبه الكثير منها
ظنته صانع حلوى
إقتربت
ثم جلست تنتظره على كرسى المقهى
الذباب يخرج من قدح القهوة
و هو يجيد ألعاب الورق
و يتساقط الآس من عينيه
لا يصنع حلوى
و لم تأكل شيئا
فقط أصابها وخز الأسنان
#إيناس_البنا

سبتمبر

إلى منتصف الشهر الغائم
أتنفسك
فتأتنى رائحة براعم المطر
و رايات الغيم الأسود
كم أعشق أشباحك المعتمة
توسوس بقصائد قتل فاتنة
تنطفئ آثار القيظ بجسدى
أتقشر كأفعى
ثم أنسدل بأثوابى الحريرية
العطر شهى /  ألعقه
فيموء الغنج داخلى
فقط أنا و وعود الغيم نكفى للرحيل معاً
للعيش داخل أغنية
 و أدفع بفلول التعرق و تظاهرات الأنا البيضاء
أدفعها من جرف حافة الثوب
ثم أنتشي
#إيناس_البنا

يرضيك كده

يرضيك كده يقرب شتا
و انت هناك بره الغطا
كل اما اعوز تلقيمة سخنة
لاجلن ما ابات
الكنكة عصيانة عليا
و الشاى تقل ف الكوبيات
يرضيك كده
قاعد بتحكى ف حكاوى عادى
سمعتها قبل النوبة دى
بتبص لى
و انا من زمان لمعة عنيك بترجنى
وتحدفنى بره
كمل كلام
حركة شفايفك بلونات
متشبطة ف رموش عنيا
كل اما تفتح ألقى عيد
و ألبس لها فستان جديد
يرضيك كده
اغنية الست تلاقينى لوحدى قاعده
توحشها منك دندنه
و الا صوابعك ف حركة تكتكه
كل اما يبدأ اللحن يعزف
و أبدأ أخمن أغنية ايه ؟
يحتار خيالى
و انت اكيد حتى الملحن بتقول عليه
عودتها و عودتنى
على يوم أجازة تحبها و تحبنى
يرضيك كده
الصيف بيمشى
والمروحة صوتها ما نامشى
و لا حلم نافع اسمعه
كل اما ييجى حضن منك تمنعه
اللحن كسر جتتى
كل اما اعوم ع النوته جوه مخدتى
صوتها نشاذ بيغرقه
يرضيك كده يقرب شتا
و يتخنق منى الغطا
#إيناس_البنا

بساريا.. رباعية

قالوا زمان دى بساريا كان عيبها
كل اما يعلى الموج بتخبى زعانفها
واما غواها البحر نطت لفوق ف الهوا
 الجزر بان غشه  ع الشط و حدفها
#إيناس_البنا

بحر احمر

ع الخارطة الاحمر اسم بحر
راسم علامة
بيقولوا ناجح أول مكرر
مش صف تانى
يا ادفع إتاوة على روحى رايح جاى
يا كل اما اعدى يغزنى
مسكت زعزوعة قصب
و قفزت زانة
قالى يا سكر انت بتهزر معانا
عديت زمان و انا مش ناسيها
فرعون غرق و من يوميها
كل اما يصحى له بدن
تجرى عليا
تمسك عصايا و تزق فيا
#إيناس_البنا

بدار و .. جارته

بدار 👨 و جارته 👩
........؛
-👩- معدن جاك تكييف يا بدارا
..؛
👨حر و واكل جلدى يا جارة
..؛
-👩- واقف ف الشباك و النظرة ناخلة حطانى
 و تدور هنا و هناك و انا قافلة عليا بيبانى
....؛
👨منك قلبى بلاد بروحين
بلد البامبى
ب طير زغاليل ورا خطين ف ستارة تميل
مد و جزر ل تحت و فوق
قسيمة قلبى مضت خنتين ف سفاين شوق
روحى التانية ف بلد الشيش
حايش من عينى السنارة
اقول راح اخبى و ما بأخبيش
اعمل ايه ف هواكى يا جارة ؟
.....؛
-👩- تصعب فيا سواد النية اطفى اللمبة للصبحية
شوف يا عنيا
 يا قش و عايم من غير شط
ماليش ف الآهة و وجع البخت
لم هواك و ادارى شوية
لتغرق فيا
و اصرف ع الكهربا و كفاية الحر عليا
#إيناس_البنا

فتحى يا وردة

يجيك الليل تلف ف حيطك الشخابيط
فتحت حضانة لاحلامى قصاد البيت
"فتحى يا وردة "
و انا عيالى بتشبك ايدهم ال طراطيف
ف "روب" الورد فيه اخضر بنقش خفيف
يمد الورد و يوسع خيطان لونه
يزق الضى ف العتمه
و اشوفك ف العنين يا امه
و بأنده لك
تدق الندهة  جرس الأهل
صور جاية ماهيش رايحه
ل حوش قلبى تقوم تجرى العيال منى
و تتجمع ف غديوة ماهيش للأكل
و لما اصحى ب اكون تايه
و اضم الحيطه بالتصاوير
مانيش عايز لقا و طوابير لخلق كتير
انا عايز اعود عيل
و اقفل ورد جوة ال "روب "
مانيش قادر ف احلامى
انام و اصحى ما اشيلش ذنوب
اكيد بكرة ها نتلاقى
و يمكن حلم بكرة يتوب
#إيناس_البنا

فاطمة ق.ق.ج

__ هـــــــــــــى فاطمة رفيقة المرحلة الإعدادية أخبرتنى يوماً أنها تشعر برهبة من بلوغها الأربعين عاماً و ربما يقضى أجلها بهذا السن ، فاطمة أنا هنا الآن بشوارع الجيزة المحببة و ربما أقترب من الشارع الكائن فيه منزل والدك أو والدتك اذكر فقط أنك يتيمة و أن أهدابك الكثيفة تأن حتى تقذف الوجع بقشور وجهى أما  ملامحك ف مشوشة بذاكرتى و أما ملامح الشارع ف معتمة لا أذكر بأي كان بيتك ، بعد شهر نبلغ الأربعين معاً كم تمنيت أن أصطدم بك فى زحام السائرين و كم خفت حينها ألا أعرفك..  تذكرت صديقة أمى التى لم تجتمع بها طوال عشرون عاماً وتعثرت بأرقام الهاتف هاتفتنى فسمعت اسمها بعد جنازة أمى  بشهر واحد وأخبرتها كلمة واحدة "ماتت" ثم اختفى الصوت ..أخشى أن يختفى صوتى يوماً مثلها ..
أترك شوارع فاطمة فيبتسم الطريق بربيع الجيزى بالقرب من مجمع الضرائب ..أعشق الهواء هنا فأبسط ريشات الأصابع كى أضمه و أترك فتات اليقين بالأرض  ، هنا تختفى فضيلة غض البصر فتمطر عينى جميع المارة بإثم التفحص ربما أعرفهم أو يعرفنى أحدهم .. كم أتمنى أن أحيا ما تيسر من حلمى هنا ..مع اقتراب شارع المحطة أقبل الهواء و أترك بضع أمنيات طائرة هناك قبيل تداخل خصلات جدتى البيضاء بخطوات الدرج صعوداً لجدران روحها دائمة الخضرة  و وصولاً لأبخرة عينى الحارقة دائمة البحث عن الراحلين الأحياء .
#إيناس_البنا

دنشواى

يا بلدنا يا دنشواى
 نازل عرق من سماى
 الملح كحت الأرض
و الزلطة تحت الكعب شبه الفرض
انا راضى بالمشاوير
ديتها رمل و جير
مش ف الرغيف لا تحت
طالب زمن اسفلت
#إيناس_البنا

صبح

صابح أجازة يا مدير
و صاحى من بدرى بضمير
الجو حر ياعمنا
و النمل عازم عندنا فوق السرير
#إيناس_البنا
صبااااااح الخيييير

دادى دادى

فى بلادي دادي دادي
ع الحرامي و ع المنادي
ينده الإعلام يمحر
ع الدماغ غطى و صنفر
يا مواطن صنف عادي
في بلادي أملي أصلاً
إبني لو عايش يصهين
اما لو لا  يبقى عذراً
راح يقولوا غفير
و منه الدستة عادي
دادي دادي
في بلادي
في اللى بينام نص بطن و نص قومه و نص نومه
من حناني عليك يا سيدنا
بند عيشك مش بإيدنا
يعني تدعي لو يزيدنا
ها ابقى اصرف لك زبادى
فى بلادي دادي دادي
ع الحرامي و ع المنادي
فلاحينك جراحينك
حبسوا قمحك جوا طينك
و اللى شخلل كل عجينك
اصل انا ساقط مهيه
"يا ابني يااللى زرعت قلبي
ع الرغيف بأجري و اخبي
قول لعود القمح جنبك
دفنوا عودي قبل منك
كل لقمه و انت عايش كسر نيه
تحت فوق مش دى القضيه"
و دادى دادى
تحت بيتنا الرصه قايمة
ليلها صاحية نهارها نايمة
شيل عزالك لو مفتح
غير العتبة و صحصح
ف كل عتبة "لسرنجة" مطرح
و انت رايح جاى ماضي
دادي دادي ف بلادي
ع الحرامي و ع المنادي
شيل مرارك مني و اجري
يمكن اوزن كيلة ملبن
كلت كيلو ونص بامبي
فتحت قلبى لأجل ألون
لقيته كله رمادي فاضى
"و الغريب اني يا صاحبى عايز اغني لحد ما ادبل و اللى بيصفر ف جلدي انى واقف اغني وحدي"
غلبت أدادي
#إيناس_البنا

عشان حاطة " روج"

عشان حاطة "روج "
اقولك عنيا و اظبط مكانك
و احوش واحدة  جاية
و لو واقفة يعنى
اقوم لك و أوسع
أزق العيال و كلمة" دا ينفع"
عشان حاطة "روج"
أنده تفاح نواعم
اسيبك تنقى
ازود ميزانى
و" خلى يا هانم "
عشان حاطة "روج "
أفك الفلوس
جديد "لانج" يدبح
و ادس المقطع
اعيد تانى و أطرح
و بعد اما تمشى
أغازل اديا اشمشم و ابوس
عشان حاطة "روج "
أخشن ف صوتى
 اقول امشى ياختى
لا أدلك ف سكة
و لا تعضى بختى
عشان حاطة "روج "
أوصل جنابك
و لو كنتى سايقة
راح أكسر عليكى
اقول منه للى
و اطبق بيبانك
و أدمع عنيكى
#إيناس_البنا

سكة و سراب

قدام عنيا لقمة طريق و بأحف
سواق و شايل غنوتين و بأسف
ليه بتوعدينى يا صحرا بالمية
يعجبنى شكل سرابك المجنون
عايش بيشتى معجبانى
 ده مطرة و إلا السكة عرقانة
عرق اللى فارق و إلا جاى محروم
طال الطريق ف الحر من غيرك
و الحر مالح زاد العطش و اللوم
الملح ماسخ داير ف ضلى
وعلى ريقى مظبط زووم
#إيناس_البنا

طلمبة

و احتفلنا ببكرة غالية
لفت و نزلت دعبست
طلعت ب مية
يا طلمبة خطوة كانت
" من معلم خلت السكان تسلم "
و العمومى من بعيد ادى التحية
#إيناس_البنا

تاكسى روح

بيشدوا فيك و روحك عند الحلق واقفة و بتزمر
يمكن ده موت بين البنين
راكن على طرف الخشب
بيشرق منك البنزين
بيركب كل يوم منهم قلق و اتنين
تخبط ف الشجر جواك
عضام ناشفة بتتكسر
تبطن سقف حلقك شوك
لا فيك قادر توصلهم
و لا عارف تقف مسكوك
#إيناس_البنا

بصة

بصة عنيه بتستخبى
ما بقتش تفتح لما بتسلم عليا
و الدقة جوة بترج فيا
بتقولى فيه حدوتة جاية
#إيناس_البنا

صباحى

فنجان قلق غالب فناجين لونها بنى
شرب لغاية ما اصطبح
زعلنى منى
و شمشم جعان
ريحة بليلة يمكن لبن
ريحة تراب ندا و طاير ع البدن
صابحة غناوى عصفورين
صفر معاهم و سابنى ليا
حايل عنيا و قالى لك حلمين
علقت لحن ع الشجر بروحين
 تاه الغنا ف كحة " الشكمان "
 رمانى الشيش
شدت ودانى القطة و الخرابيش
عضة ل سوس الاسنان
و افتكرت انى.. جعان
#إيناس_البنا

ملف ألبومات

فتحت ملف الألبومات
باعت لها نظرة عنيه
طب ايه كمان
فيه عنين كتير متفرقين
يجرى الملف و تجرى شعرة شطة من جوفها
و ف شهر سبعة بردت حروفها
شدت لحافها و خيطت فيه دمعتين
ضيق سؤال
زحمه العنين طب صورتى فين ؟
و كلمتين بيكملوا ف يمكن و عادى
كح الهوى منها النوبة دى
تبلع ف برشامة سكوت
مالح ف ريقها طعم البيوت
#إيناس_البنا

يا سحابة

يا سحابة علقت الادين
 و طلعت
مسكاكى اوعى تمطرى
سيبى البياض جواكى ملو العين
خلينى طاير و اقرى فيا البخت
لو عطشوا منك وردتين
مسموح ساعتها ترمينى تحت
#إيناس_البنا

مسحراتى

دق الصفيحة بيرعش شفطة الشاي
دن ددن
فايق غناك يا مسحراتي
واقف أنا و شايف هناك
بيت الجيران عنده فانوس
 بزعيق عيال ملبوس
ضي الفانوس
 لبس إزازة مية بتنزل ف السبت
لأجلن ما يشرب قبل الآدان
بيت الجيران عنده جدة تضحك تقوله
خبي الهلال يا مسحراتي
لسه المرق مالي الأدين
دن ددن
اصحى يااا
نطت أسامي صغيرين
يااحبيبة و ياا منال
قلبت الحارة ل ضحكة بلكونات
كل الحبال شابكة العيال
دن ددن
طلع السبت
لبس الفانوس صوت العيال 

في قلبه لمبة صغيرة 

و ضي فاكر " خبي الهلال "
#إيناس_البنا

بالداخل

بالداخل عصفور
يخشى النوم
فيسقط كل ليلة ورقة من شجر نتيجة معلقة بالحائط
يصنع طائرة ورقية
يكتب عليها غداً ثم يخفيها تحت الوسادة
الأحلام لا تقرأ فتفتح لصور الأمس
بالداخل هرة تنطلق صباحاً لتبحث عن عصفور تأكله
 ينقر عينيها
فتتبع أذنها ركضاً حتى أرسم لها بعد النوم عيناً أخرى
ثم هناك بئر يستقبل الحجارة كى يرتوى آخرين
كل ربيع يثمر الحجر ملحاً  فأغرق
بالداخل غراب
يبحث فى الأرض
فأدفن كل ليلة طائرة ورقية
#إيناس_البنا

فى الشارع

فى الشارع
تمشي قصائد النون الصالحة للأكل
تنظر لطفل معلق كبندول ساعة بخطو رجل
فيخطف منهن الرغبة فى قانون النسبية
و فى تفصيل الأعمار
و زكائب من كلمات تسبقها "ربما "
تتلامس بعض النظرات
لتقضم الهواء البارد
الضحك لا يمطر اليوم
فأتثائب 
و أحدق بطلاء شرفة بعيدة
لم تعرف أنها تملك بأزرقها بعض سماء
و للسماء تصعد سراً خطوة أخرى نحو شرفة جدتى
أصابع الخبز و أكواب اللبن
كم تمنيت أن يعود ذاك الصبح
يأتى الشهيق بأرواح العائدين من السماء
أوقظ يدى فأمتص أرواحهم و أغلق أحرف النون
ثم تركض عيني خلف القطط
#إيناس_البنا

قطة ماتت

القطة دى ماتت
نَفسك فيه كام قطة لسه ها تقتلهم  لأجلن ما تتمرن على التشليت
نَفسى فيه كام نفخة بتطق للشارع و لسة الشوارع وشها مزرق
بتكح ف اليوم دستة ولاد آدم
واقفين ف زورها  واخدين مخالفة إشغالات
طب فين ها ابات ؟
بيرق قلبى ل اكوام رصيف صاحية
 القلب بقى منخل
كيس الطحين صدق و راح ينخل
طلع الخبيز م القلب للجعانين
خلص الطحين و القلب سوس
لساه بينفخ هوا ف بق الشوارع
يطلع فراش
لساها زرقا الشوارع
تاه الفراش و لا لاقى نقطة ضي يحضنها
و القطة دى كان فيها عفريت
بيكرمش الحواديت
يفتلها جوة الزيت
و يولع المصباح
كتروا الحكاوي و شردوا العفاريت
كل البطون صوصوت
 حضن التراب نونو و صاد
حضن العيال
لعبوا الشوارع و قسمونا لونين قشاط
زرقا الشوارع
عصافيرها ماتت م العياط
#إيناس_البنا

دربُكة

بتبدأ الدربُكة
طبلة قامت دق زاطت
هز فكة
و بأتمايل
و انا قاعد على الترابيزة 
قال يعنى
غرام والع بيلسعى
و اقول ليت
و انا ف سرى كمان ليت
تشق الطبلة و تبطل نمر بايتة
يوماتى شايفها تتمرجح
امد اديا ف جيوبى
و اقوم ناطط على المرسح
بأنقطها برشة بنكنوت مظبوط
و مختوم جوة بنك الحظ
يقوم الغاوى يتشطر و هاتك "دانس"
و فيك من يكتم الأسرار
تغمى عنينا ف الساقية
أنا ميت و هو حمار
‫#‏إيناس_البنا‬

مأدبة صبح

كوجبة خفيفة 
عينى تقطف فاكهة الليل
هى طازجة دوماً 
و هنا لا حليب للملائكة بالأرز 
ربما كرهوا الوزن الزائد
فلم يطلبوه الليلة
فى وقت منتصف التثاؤب
يأتى خط اللون بالحائط
متناثر / عشوائى
يخلط الإثم بالظلال
يتأرجح
حتى يوقظ عصفور بالداخل
رائحة الصبح شهية
و أطفال أنفى جوعى
بعد صلاة الشجر
تصحو العصافير الأخرى
فتأكلها أذنى
‫#‏إيناس_البنا‬

طائرة معلقة

طائرتى المعلقة بالسقف
لم تعد تهمس بالرياح
فقط تطن
فيتساقط النحل ليلا ً
بالطاولة مأدبة طعام
تشتهى العسل
و الصيف لا يترك الموائد جوعى
فأنتظر
قطرة لك و قطرة لى
تأتى القطرة الأولى
و
فمك بلا أبواب أخرى
فلا يخرج النحل
أوقف الطائرة
يغالبك عطاس يخرج منك حبوب لقاح
جنين الزهر الطائر
يزرع عينى
ما زلت جائعة
فألثم فاك
أطن ثم أمتص الرحيق
‫#‏إيناس_البنا‬

نكهة للشاى

أوراقها الخفية
تضعها بقدح الشاى
كنكهة قرنفل مقدسة
هنا طاولة وحيدة
على أرصفة متحركة
و هى ترشف من روح القدح
ثم تنزع شفاها جانباً
تتركها لتجف بالخارج
فتصبح ورقاً
تخفيه لقدح يوم آخر
الطاولة ملك يمينها
تسقى لها خمسين خريفاً
و أنت
لا تملك أرصفة
لذا عندما تعبر
لا تفتعل الظمأ
#إيناس_البنا

بدلة

ف كل يوم تتلبس ع الوش بدلة
الضحكة تقفيصة سنان / فاضية
لا فيها صوت لفرخة بتكاكى
و لا حدف ريش
البسمة /روح استلمها قبل ماتكرمش
مغسولة م الاحلام
على شماعة منين و بكام
اركن قميص العيش
مكوى و متسرح
واقفل زرار الرقبة ع التفكير
باكية المخدة و ميتة المناديل
فكر ف "يمكن"
يمكن يجيلك صبح و يفرح
يبقى تمام
و غطى البدلة لما تنام
‫#‏إيناس_البنا‬

الحساء الأحمر

المائدة حلزونية
تزخر بالحساء الأحمر
فى الأسفل ترس الطهاة
بالأعلى يتدلى الحبل لتصعد الروح الفائزة
ب "كوبون " اللون المجانى
و مشهد جانبى لنهر منزوع الأظافر
يلفظ الماء خشية الغرق
#إيناس_البنا

ف عنيكى

ف عنيكى حدوتة / كحلة و بنت بضفيرة
ارمى اللى جاى ع الأرض يتحرك
كيف الصَغير من غير علام بيدق عضمه / يشب
يمسك مكان ما يحب
لو يتجرح يرمح
لروحِك
يرفع اديه و يحب يتمرجح
على شجرة  الحلم ف عنيكى
سيبى الخطاوى لحالها و سلمى عليكى
#إيناس_البنا

حال

قالك يا حال إتوصف
منه الكاوتش اتحدف
من زحمة الإشارات
رزع المطب ووقف
#إيناس_البنا

جريدة

سطرين يادوب حالى و بكرمشِك تانى
بصى معايا شوية ع الدنيا من بره
انا مش ملاك شفتشى انا قهوتى مرة
يا ام الورق جلدى و الحبر كان صينى
استقرى خطين شقا على يدى و جبينى
الإسم جورنال محلى و ملحك ملا عينى
طبقت حالك كده على جنب دكاكينى
سايبك لمين يشترى
و ال مين مسك خدك و ضربنى بالمطوة
نفض ف جيبى و عطس / فيه م التراب زحمة
قالى مرار قهوتك ياما عكر العناوين
محبوس ترابك هنا و ابقى اشترى الخطوة
‫#‏إيناس_البنا‬

"صورة " مشهد البائع

دى شقلبت حال الحاجات
يا دى اصطباحة بخناقات
ياست بايع بس الشرا ارزاج
ماسخ عليكى الكحلتين دلع البنات
#إيناس_البنا

تابع رد" صورة".. مشهد السائحة

اقرأ الجميع
الشرفات المتهالكة
منتصف اصابع الشيطان
و ملصقات الشفاه
و المرأة المفعمة بنظرات فارغة
لا تعرف ان روح البنطال تكرهها
و لا تعرف أنى لا أهتم
سوى برائحة تعرق تملأ الأرض
وتتصاعد لدفتر صورى
أيها الباهت ذى القبل
عندما أعود سأحمل معى قبلتك
مشهد جانبى
لبؤس شرفة لم تملكها يوماً
إغتصبت شفاهك زخرفها
و لم ترفع دعوى ضدك
ها هى يدى تلوح لكم بالرحيل
وربما ترتفع أيديكم خلف إلتفاتة ظهرى
ربما .. فأنا حقاً لا أهتم
‫#‏إيناس_البنا‬

شجرة توت و ذاكرة المعطف الأبيض

كُسِر لوحى
فلا أزرق اليوم
و رأيتها عند الصباح
شجرة التوت القديمة
كانت تنتظر موسم الثمر
- بآخر غطاء يخفى الشارع عن المنعطف -
و كنت أنتظر تبرقش الأرض باللون الأحمر
غاب اللون
و فى هذا الصباح غابت هى
إلتف الشارع بلا ظلال /سوى داخلى
و تناثرت صور المعطف الأبيض المبرقش بثمار التوت
هو - المعطف - لم يضجر يوماً برحيقه
و الضحكات لم تعبأ يوماً برائحة الفورمالدهايد
و أنا لم أخبرك قبلاً عن إختفاء الشجرة
فاسقط بعض روحك بمنبت ريشة واحدة
و أخبر اليمامة أنى أدخر لها بعض التوت
لتعشق نورس و تراوده
أنتظرها
فى ليلة هذا الصباح المتعب
و الأزرق يندفع إلىّ
تأتنى
كإندفاع القُبلة فى موج شفاه
دوامة عشق ..ألثمها
فتغرق اليمامة
...
‫#‏إيناس_البنا‬

فقرة ..المليحة و أبو فانلة ..من "صورة"

شفت المليحة ام العيون مش توبى
زقتنى نظرتها بربشت من دوبى
شاورى لى يا امو الدهب ع الشعر يلمع لى
بايع بلاش مهجتى بس اشترى ذنوبى
.....
‫#‏إيناس_البنا‬

فاتورة

اليوم الحرارة مرتفعة و الزحام خانق و لكنى لا أريد العودة الآن .. "السوبر ماركت "يعنى وقت مستقطع من الهواء البارد و - تتفقد حقيبتها - معى ما يكفى ..." على جنب لو سمحت " بين أضلع البوابة أشعر بكلمات أغنية " بالأحضان " تهوى كهواء التكييف على مسامعى تتبعها موسيقى هادئة رومانسية ربما "love story " فى مشهد بحث كلا الحبيبن عن الآخر .. دائماً أحمل السلة فلا أحب العربات و زحامها هنا أيضاً ...أغلفة الشيكولاتة وحدها تملك سيمفونية سعيدة أحمل فقط نوعاً واحداً من الدرجة الداكنة ولكن فى كل مرة أحب سماع مقطوعتى المرئية ..لا يزعجنى الوقت لكن أكتفى بعد حساب تقديرى لقيمة الفاتورة .. مراجعة سريعة بعد الدفع ثم " توكتوك " العودة ......... ....
فى المساء زيارة روتينية لحقيبتى لإستطلاع الميزانية المفروضة و ها هى الفاتورة و ..فاتورة أخرى أقدم .. أتفحص القديمة .. لا خصومات فى ذاك اليوم " كم هى مزعجة رؤية فاتورة بلا خصم خاص " .. أكرمشها للتخلص منها و أتطلع بسعادة لفاتورة اليوم ثم أعيدها للحقيبة ثانية ....
‫#‏إيناس_البنا‬

صورة

ف القلب فاترينة
باصص إزازها عليا
ف الرايحة يغمز لى
ف الجاية يمسك اديا
يا أم الخيطان دهبى 
نادهنى كرانيشك
يا عم هاود معايا
ف السعر يا اسمك ايه
ها اشوفها طب ورينى
و اللى اتفقنا عليه
مسكاها مش هى
قالى دى م الفاترينة
بصى لها يا عنيا
قلبى اشترى و مشيت
وصلتها للبيت
و تانى يوم عديت
من غير عنين الإزاز ما تبص ف عنيا
..........
‫#‏إيناس_البنا‬

سيكون لها

........................(1)
ألهث بجوارك ألا ترانى
انا هى
لا تنظر للقبر الآخر
أعدك أن يتسع
أن يكفيك
فلتقُبر أحشاؤك بى
كما كانت من قبل
من وقتٍ بعيد
ولتنظر لصنيع العين الأخرى
لقسمة عادلة بين الرحم و ال.. الرحم
ولدى ألا تعرف
الدمع لم يصلح لخبيز اليوم القادم
للكعك الأحمر
و انت من يأكله
انا لا املك لون يكفى
و هو يعرف
أنى أحتاج اللون لكعكة أخيرة
...............................(2)
لم أحفل يوماً بأصوات الفحيح
ربما تلك الزاحفة \تجد بعض رائحتى تعرفها فتذهب
عزيزى لا شيء بقربك فلا تخف
انا افعاك المجلجلة الوحيدة هنا
لترقص معى بعيداً
أنت قاتم منذ مجيئه
ألا تدع هذا الآخر كريه ال ظن
يملك أعين تلك المرأة فى بلادك
ينزلق من عينيه نصف دائرة مضيئة
و جميعها معتم
....................................(3)
استبق أمنيةً أخيرة
للنصل
فلتنظر لعظاءتك الجميلة
هنا لا هواتف
و الأم لم تعد تنتظر أعذارك
و لم تعد تبكى
أنت و هى فقط
و المنجل يفصل بين يديها المعلقة
و ذراعيك
أنا لم أنتظرك يوماً
و لم اهتم
فقط هى من كانت
عاهدتها عليك
و انا لا اسقِط وعداً
فلا تحاسبنى اذا وفيت
...................................
 ‫#‏إيناس_البنا‬

فى يوم مخصص للسفر

تخطو قدمى للمرة الأولى  هذه الأرض الواسعة التى تحمل نصفين نصف مغترب و آخر لساحة مناديل دامعة ..فى المطار  رأيت أعينهم فخشيت على عينى من زحف العدوى أريده أن يذكر إبتسامة و نظرة عاشقة و أنا أدخل بين ذراعيه لمرة أخيرة قبل الطيران.. انتظرت بالخارج لبعض الوقت حتى ينتهى من وزن الحقائب و يهاتفنى  ..حقائب السفر تتحرك متباينة الأشكال و الألوان فاستوقفتنى "ربما تتحرك بها بعض أرواحهم " و البعض يحمل صناديق من الكرتون لا أعرف لما تخيلت من قبل أن المسافرين مجموعة من البزات الأنيقة تحمل دوماً حقائب للمتعلقات الشخصية من "لاب توب " و خلافه و يتساقط منهم رائحة عطر لمنظار شمسى تتخفى فيه ملامحهم و لكن هؤلاء -من أراهم الآن - تحمل أعينهم أخاديد لا تختفى و على جباههم بعض القمح الذابل و أحرف كلمات " لقمة العيش مرة " .. الكراتين  ، حقائب الظهر و أيضاً بعض الأكياس البلاستيكية  تحمل أرجل للرحيل و ربما بعضها لا يحمل زجاجة مياه لعطش الوطن ...و ....  جميلة هى سلبت نظرتى من ألوان الحقائب و ترجمة الأعين  ، صغيرة ذات ملابس مزركشة شعرها يصنع تموجات بنية فاتنة ، هم حولها 

" ترى من منهم يحمل لها قبلات الوداع ؟ " ..أعادنى الهاتف من متابعة قفزاتها الصغيرة كى يأذن لى بانطلاق رهبة الرحيل و أنه قد عبر الخط الأحمر بينى و بين الأرض الأخرى  ..ثم ذهبت 

ـــــــــــ فى البيت ..أدخلت بعض الملابس الواقفة بجانبي لحقيبة أخرى أكبر و لكنها تحتل مساحة الحائط .." كم أكره هذه الكتلة الخشبية و لا أدرى كيف تحول صندوق الملابس لهذا الدولاب الضخم و كيف تعامل الغابرون مع ثيابهم بنظرية " ألم هدومى ف قفة "..تذكرت الحقائب فأجفلت و أفقت لأتأمل ضلفتيه المغلقتين - لطالما تأذيت من فتحهما الدائم كفم يمتلئ بطعامه -  لكن الآن أحسست بوحشة من أناقة مفتعلة لفم مغلق و ..كم أفتقد صرير الباب عندما يأتى ، جوربه الملقى أرضاً ، منظاره التائه ، و رائحة عطر تختلط بروحه .. فى النوم تزاحم الغطاء ليلفظنى و مددت يدى لأرفع الغطاء إليه فسقطت بجانبى لتوقظ منى نصف عين و اغمض النصف الباقى داخل سترة كان يرتديها و لن أقوم بغسلها   .. 

ـــــــــــــ

#إيناس_البنا

هاموش

عندما يأتى الهاموش
مش شكل شكله بتاع زمان
ف النادى كان 
بيحضن العواميد
شبك طاير و لا بينط ف المية
ع المغربية يلف ع اللمبة
و يتعلق مع اللفات
شبه غزل البنات
نخاف شوية من حدفته على وشنا
ننساه كتير لما يعدى ع المية نور
لميع و بيزق الخيال
خبط يا مركب متغطى بالمرايات على بكرة
- و دايماً بكرة يتحمل دلع البنات -
يمكن أعدى لبر منسي م السكات
و بضحكتين يقف الهزار
إجرى يا عيل م العيال
و أجرى و عنيا مقفولين
حاسس بأطير مع إنى بطة ناقصها ديل
__قرصة يا بنت اللى هاموش
قمت م الصورة باحوش
كيفها كده و لا تفهموش
جيلها الجديد
بطل يحب ف العواميد
و عجبه عض الإيد‫#‏إيناس_البنا‬

عويم

و عايز قلب ب "البونص "
و نازل يشتريه م السوق
قالوها زمان م هوش لعبة 
تنفض فيها و تهاود و تختمها بفم غسيل
و كلك ذوق
يا متعكرت و فاكر عومك البراميل
قوامه "كرامب "جاب رجلك
و تتعلق حدادى عنيك بقشاية
بنفخة طوق
ف لونه اسود مقضيها بيتمرجح
و طالع فوق
يا عينى عليك ماسك رجليك و بينط السمك حواليك
‫#‏إيناس_البنا‬

زيارة

زورى قلبك خبطى برقة عليه
دفى ايدك بجناحين لما يفتح لك هاديه
خيطى الريش ريشة ريشة فوق سلوك النبض الاحمر
و اطلعى فوق دقة عالية تحت شمسك بصى للطير و إفرديه
‫#‏إيناس_البنا‬ 

قلبين سحاب

مبسوط شبكت يا اسمك ايه ؟
يا سحاب و رابط قصة فيه
شايف مقرب لون غميق ها يتقلك
و تنزلك ع الأرض يعنى
ها تقول مطر \ ها نقول دموع 
تملا عنين \ يا تسد جوع
آخرتها إيد أو شوية حر يصحى ..ينشفك
‫#‏إيناس_البنا‬

رمد

و كل ما تكحل عنيها
و تبهجها نظرتها
تفتَح
زى فتحة الورق ف الورد
تعاكسها غمزة ع المراية
خبى روحك من عنيكى
للطريق يفتن عليكى
تفرد جناحها لنسمة بنت ربيع
- ماسكة الشتا و هو غاوى يضيع -
من عنيها طلت بسمة ما لقت حد
جاملها الهوا ع القد / دبلت
و عيون شافوها
قالوا رمد و قالوا دول دمعتين ع الخد
......؛
‫#‏إيناس_البنا‬

أوزون

تمنى أن فى إرسال بعض عينيه ما يكفى لتعلن هشاشة أضلعها و إرتجاف الكلمات كانت تعرف فأمسكت الهاتف فى حوار وهمى لطرف آخر: أخبرك سراً أتعرف ثقب الأوزون أملك فى الذاكرة ثقباً مثله فربما ترتعش يدى و لكنها فقط أعراض شيخوخة ...
‫#‏إيناس_البنا‬

رباعية عن الحب

الحب ضربة وهم بننفخ فيه علشان ضبابه يعيش
تقوله عيونك الحلوة ما بتفوتنيش
يقولك لف لا مؤاخذة مع النظرة
و لما تدوخ و تتطوح ها أسيبلك م الوجع بقشيش
‫#‏إيناس_البنا‬

رحيل

بين الرحيل تخطف لمحة مما يركض ورائها
خائفة
كأن الهواء ينسل منها بتلة ورد فى كل لمحة
يسقط هُدبُ من نظرتها
بعد رحيل الأمس و أمس آخر 
يصل الشوك
يسطر نفسه
بال قاف أو بال كاف
لا تراه ..هى فقط تحمى عينيها من الهواء
بكفها ..و تظل ترحل
...........
‫#‏إيناس_البنا‬ 

قمر و عيال

شايفك مدور غزل البنات
طلعت لك سنارة فوق
علشان أشدك من سكات
أنا و العيال
راضيين بفتحة خمسة ملى 
تحدفلنا ع البوء سكر
أشبك بقى عايزين نحلى
.....؛
‫#‏إيناس_البنا‬
الصورة الإلهام من إختيار Wegdan El-Dawakhly

عشق

عندما لا يأتيك ليلاً و يترك النداء معلقاً بمفصل الباب
يتدثر الغطاء بأنفاسك و تركض الأسئلة
حتى تصل بك النقاط ل أذرع اللاشيئ
فاعشقيه
عندما تنتظرين دوماً ان يقتل بعض فئران 
تخيفك حتى تقتليهم أنت
فاعشقيه
عندما لا يستجيب لمداعبتك الصباحية لإيقاظه
و يقفز من فوره ليجيب هاتفه النقال
فدعى أمطار عينيك جانباً و اعشقيه
عندما تمكث أصوافك لبعد الصيف عارية بأرضية الغرفة
تنتظر نزول الرف العلوى
تذكرى بعد كل محاولة و سقوط أن تعشقيه
.....؛
‫#‏إيناس_البنا‬