لون أحمر

بتلم غسيلها بلون أحمر
تلمسها البلكونة تطير
و أنا مش قادر ما أرفعش عنيا على الملايات
أصعد ..تجرحنى العصافير
....
إيناس البنا

جنى

و إن تسأل عن الجنى
إحم يعنى
أقولك هو جنى أصيل
سايب معايا لمبته
سايباه أنا يعمل أمير
بيرسم الحرفين غواية
قدام مراية
واقف ما بينى و عكس صورتى
بيشدنى جواها و يشدها لبره
واحدة زهقت م القزاز
و التانية مخنوقة ف هواها
لما نتلخبط سوا
يلفنى بملايات
يقرطف ف الجناح
لحن و أغانى
و أرقص معاه
لحد لون الريش ما يظهر
نفترق
و أحدفها تانى جوة القزاز
يخاصمنى يوم
و تهزه دمعة ترجعه
يصالحنى برعشة المية ف طريق على جتتى
يجرى الكلام
ينقط من شعرى للشارع
يضيع
و هو.. ينسانى ع العتبة
يحضنى آخر الليل
يتعشى بدماغى
و أنا قلبى دكان صور
يعزمنى على قهوة
و يخطف دقتين منى
أزق الساعة أكون عنده
فيقسم حلم ع الورقة
أقول تصبح يقول أحلى .........؛
إيناس البنا

حدوتة مراية

المراية بداية بنت بتبص لنفسها
بتكبر
المراية حيطان أليس
تلمسها تفتح
زى طاقة من خيال
تشوف خيال الجنى جنبها تتفزع
تلاقيه معدى بين هدومها
مطوح الجناحات
و يزقها جوة الملاية
لو تستحى يلحق يخونها
لو تستعيذ ترتعش ف طلعته م البدن
المراية ورق لنتيجة صاحية بتشوف عنيك
تجاعيدك المزنوقة تحت الرمش
و خط نازل بيقول يا بسمة ف الشفايف إحتمى منى و لمى ضحكتك
من يوم و رايح خبى الصور عن سِنتك
.......
إيناس البنا

مشكلتى معاك

إوعى تكون مشكلتى معاك
إنى يا دوب مش قادرة أنساك
إسأل حتى فريد ها يوافق
إنى غريق و إنت مش المية
إنت الصَدفة اللى نزلت لها
فتشت خرايط عن نيلها
و اما لقيت البحر شايلها
خدِت الموجة منى اديا
و أما لقيتك صَدفة غنية
قفلت عليا
عشت معاك تحت الموجة
نفسك كان يتنفس ليا
عطست لقتنى
نايمة على الشط شوية
........؛
  إيناس البنا

كراسى

قلبى كراسى مطَوحين
و إيديا حلفت ميت يمين
ع الصبح يطلع من هنا
شبيت لفوق
يمكن وقعت
بس سبت عنيا بره مفتوحين
....
إيناس البنا

أكياس صغيرة

شكراً للأكياس الصغيرة
أجمع فيها بقايا خطوات الصباح
بعض خيط متوفر من ترقيع عينى
كيس من البن المطحون
و ضمادة تالفة
و ربما أحمل أعمدة إنارة لطريق يتوحد ليلاً
طريق لا يملك تقاطع على شرفة مقمرة
يتضاحك مع أربعين خريفا
فلا يرى ما خلف خطوات العشق
شكراً للكلمات الصغيرة
فهى تحشو الآخرين بلحظات وداع لا تأتى
فتحمل عينى زحام مناديل بيضاء
بعض مياه عالقة
و بالأسفل معاول جانبية تحفر شفاهى
كي لا أتحدث
شكراً لأظفارى المتقصفة
فهى هكذا لا تخدش أوراقهم الملونة
....
شكراً لمساء يجمعنى بكم

إيناس البنا

أطياف مرآة

الجسد يختار المرآة
يتندر.. فتضحك
يغريها بالصبح
فتنتظره
يغشاها النور
تنزعج
فتغمض عينها الواحدة
أحمق هو ما زال ينتظر
و ما زالت الرؤية مظلمة
لا يرى بعد إنعكاس نفسه
الجسد ...يعتقد إصابته بالعمى
يغضب
فينقسم الضوء
لأطياف سبعة
يحمل كل طيف جزءا
من يختار الأبيض يهوى
لا يدخل روح المرآة
فى بعض الأزرق أغرق فيك
لرحيل الشمس
و غروب الوقت
الجسد يقلب خارطتى لنداء قطار
الرحلة لآخر أيام تصحر
للأصفر ..لشريط رمال
أما البنفسج .. فلا شئ
أنا أكره الرجال و البنفسج
أقتل طيفه
فيبدل روحه بالليل
كى أتحرك نحو نهاية الضوء
أية ضوء
فيكون الشفق الأحمر
و الأحمر فاتورة نعش
بلا تأريخ
أرقام تفوح منها رائحة زنازين
أنا حبيسة و جائعة
 الجسد شبح يجلس بمائدتى
يغلق مضغات الفك الأيسر
بخيوط جراحة
و يلوك ردائى المرقع بالصور
 الصور بدينة
تتأوه من ثقل النعش
تقذفه
فتنكسر مرآة اليوم
........
إيناس البنا

إحساس ما لبسش فستان أبيض

قدام فاترينة إتمسمرت
قلبى زرع جناحات
دقيت سماها القزاز
فتح لى فستان أبيض
متعلق على عصاية
محتارة روحى بين بيبان الصبح
الضى ملفوف ع الحرير
بيزغلل
مقاسه على طولى
من غير دواير
و شعرى فيه وردة
من غير تاج
و الطرحة زجزاج قصير
متطرز الحلم ف طريق متغطى بالفلاشات
بصيت عليه تانى
و طلعت م الفاترينة
على خطوة شبكانى
بيقولى يلا يا أمى
الدرس ل يفوتنى
بتبصى ع الفساتين مين شكل فستانك ؟
أقوله يا إبنى زمان ما لبستش الأفراح
كنت إنت فستانى
..........
حدوتة على قدها من عنين بنت إتجوزت من غير فستان أبيض
....
إيناس البنا

عصفور

شايل حب ف إيدى و ماشى بأكل خلق الطير
رنة فرحتها ع الأرض تزغرد
تنده كل يمام الصبح
جوة القلب الشجرة يزقزق صوت جنية
قرب من غصنى يا إنسى
لِك أمنية
و أنا بسمعها
من غير أى كلام بتقول
أرد عليها ..ممكن يعنى
أفتح كفى أكون عصفور
....
إيناس البنا

إسمه أحمد

إسمه أحمد
أصغر من الحكايات لإنه
لسة ما عرفهاش
قلبه كان يرعش من الخوف لما أقرب منه حقنة
بس واقف مش بيرمش
صرخة تفلت
يقولى عادى أصله دور برد النوبة دى
حقنة واحدة مش بتوجع بس ممكن تبقى آخر واحدة ديا
شفته تانى بعد غيبة
شعره واقع بس سبقه جوة روحى
قلبى واقع م السؤال
يحكى و يضيع جروحى
ال قد فتفوتة عنين
قدام عنيه المليانين طيف زى ضحك زى صبر زى ما بتحكى تقولى
بطلت أصرخ م الإبر
.....؛
إيناس البنا

عزف

لا أحد يعرف خطوات العزف
فلتغمرى آثار البرد غاليتى
بدهان آخر يحمل العطر الأجمل
لرقصة فردية
وردة واحدة تشبك خصلات لم تصل يوماً لعمر الطيران
وحدى و كأس من التفاح الأخضر
و رعشة بلا لون
فمن يسكب اللحن بروح خشبية
كى تراقصنى
و بعد الغناء تعود للشجر
أدور بساحة عشبية
يدى تبدر الحب غذاء لساكن الصوت
هو المتفرج الوحيد
يشير بعصاه
يمطرنى الورق الأصفر
فأنقسم هرة و عصافير
.......
إيناس البنا

عصاب

بلا رؤية
بيدى
أغلق منافذ الآخرين لروحى
لا أحد هناك ليرى كلمات البعث فى عيني
البشر
بضع آثام تعلق بأرض لم تكن يوماً مقدسة
و المرآة إختارت أوجه آخرى لأطباقها اللامعة
رائحة اليوم
تحمل القليل من الأدخنة
خارج العصاب
خطوات قاتل محترف
و بعض الدقات الزائدة
إحداهما سيملك منى بعض رؤية
و يرث عصابى
....
إيناس البنا

لا أحد هناك ليرى كلمات البعث فى عيني
البشر
بضع آثام تعلق بأرض لم تكن يوماً مقدسة
و المرآة إختارت أوجه آخرى لأطباقها اللامعة
رائحة اليوم
تحمل القليل من الأدخنة
خارج العصاب
خطوات قاتل محترف
و بعض الدقات الزائدة
إحداهما سيملك منى بعض رؤية
و يرث عصابى
....
إيناس البنا

أبيس

أنت بلا أيدى و أنا أوزع الغنائم
أهبك سماء فضية
فالذهبية لى
و أنا أملك كأسا كى أختار
فإنزع عن قدميك الوادى الأحمر
"موشيه " لا يكتب
يعرف أن سماء أخرى فوق النار
و الجذوة آخر ضوء
يتركها و يعود
هم أهل البلد المختار
يختارون الصنم
المعتاد
يغرق
يمتلئ البحر بآبيس
تمتزج بقايا فرعون بروح الماء
فيأتيه الإثم بريق
يحيا البحر بلعنة ما يلمع فيه
و يهب سماء ذهبية للشعب المختار
......
إيناس البنا

زعل

لما أزعل
شدنى جنبك
ما تقوليش مالك غير مرة
لو رديت 
يبقى أكيد تعبانة من بره
شدنى بشويش
بين العضلة و دق القلب
براح جناحاتك
نعكش شعرى
و اقعد قلب صور الشاشة
انت عارفنى بحب حاجات طايرة بنفاثة
جوة الروح
فضى المطرة المعجونة فيا
ممكن أنام بس شوية
صدق منى مش طماعة
لمابأقولك
و إوعى ف يوم تسمع لى ف كلمة سيبنى شوية
....؛
إيناس البنا

ندر

الشمع مش ندرها
و ليها ف اليوم لفتين حوالين مقامك
شايلة ف إديها أربع حيطان
حوالين عنيها مقفول بيبان الأوليا
عميانة و السكة بحبال متعلمة
و العتبة بس ال موصوفة لها
قبة منامك
و تخاف تقع تسند على الحيط جوة منها
تعشق تفتح
تلمس ف وردة واحدة واحدة
تنطلق منها الأسامى
تفرح
تلف تبشرك
إن الورود شايفاك أكيد
و حكت لها إنك مطر
دايما بترفع للسما دعوة عنين
...؛
إيناس البنا

سكر

أنت كقطعة سكر
أرغب أن تذوب بفنجانى
فتغتصب مرارة القهوة
و ترغب هى أن أرتشفها على مهل
فيمتد الوقت بنا لما بعد البرودة
القطرة الاخيرة تعنى دقات الثانية عشرة
و قدمى متورم لا يفلت حذاء السندريلا
ربما لهذا هو لا يبحث عنى
و أنا لا أركض
فى موعد منتصف القهوة
أستيقظ
فأختار الرقص بصخب مع فتات شمس
منكهة بأحلام يقظة
أسقيها بماء الفنجان
هو بنى و هى تذوب
فيكون الغرق فى هذا اللون حياة
و أكون عجين طازج وردى يتذوق رائحة الأطفال
و يصبغ شفاهه بالرغبة
أختمر برشفاتٍ أخرى
فيمتد الصباح بغيمات بيضاء ماكرة تأكل بعض اللون الوردى
و تشرب الوقت كقهوة باردة
.....
إيناس البنا

زبد

ترتحل روحى بالأزرق فيك
يا حلوتى
أمواج شعرك ترتعش
و الرسم لقلبى
و أنا أنتظر شواء النبض الأدنى
فلا ترسميه بورق لقاء
و لا تحزنى
هى فقط لعنة شواطئ
و أنت زبد ..يتكسر

يوم

تثاؤب
ينفض أغلفة اليوم المفضض
يحوى أمنيات طازجة
كأشعتها الصفراء
إختيار اللون صحيح
فأنا أكره الذهب
الصبح ينقل خطواتى لأزقة
ينتعش بها طهو الأرواح
مقابض للضحك
شرفات دامعة
و ستائرهم مغلقة الأعين
كم منها يظمأ لصحو الآخر
وكم آخر لم يعلق يوما بحواف نافذة مغلقة
يرتد الزحام للأرض
الشارع يمتلئ بقطط سوداء
و أنا أيضا أرتدى الأسود
فمن منا له أسبقية الحداد ؟
.....؛
إيناس البنا

و...

و .....
البنت اللى انا واقف تحت البلكونة ف بيتها
البنت اللى تجنن ضحكتها
بأسمعها و اغمس قلب و عيش
ده بواقى الحيط من ورا منى دفعت بقشيش
فتحت لى
و شبكت ف صورتى المتمسمرة لعيونها
قلب شرايط دانتيل
حدفت لى سبت
متكرمشة فيه ورقة إستنيتها
.. شايفة ف ايدك بكر الصوف
كل ما تعطش
تحدف قطة بطرف البكرة
تجرى و تعشق شد خيطانك
تشبط روحك ف الخرابيش
و أنا يا الواقف جوة الحيط
دايب منى طرف الخيط
كل ما بأجرى بعيد أتكعبل
تسبق خطوتى عفرة شوك
لمت كل أسامى الورد ف روحى
و إنت مشيت
قلب الشارع يومها فارقنى
وقبل ما يكنس ضلك فيا
ضم عنيا
و حن عليا بخطين صفر
....؛
إيناس البنا

زوايا

أعلم أنها تأتيك بالعطر
و أنها تحقن كل زوايا الربيع الكائن بين يديك
فلا تأتِ سراً خطايا النسيم
فيهتز وردى
و لا تنتظر ذبول المرايا شوقاً إليك
ألا تكتفى بعصفور منى
كى يثور الشجر
و تزهر "ليلى"رحيق الصور
و صوت الصور يمتلك ليل حائط
كصبحٍ تنفس
فأعلق بين إغترابى إليك
و لوح الزجاج
و يا ليتنى كنت حائط أو صور
....
إيناس البنا

سفر

اليوم زفاف زوارق قبل السفر
لم تعد تطلق صوتا
فقط تلتف بالمناديل البيضاء و تلوح من بعيد
قاطنى الأرصفة يحملون شرائط وردية
و عبق المالح
و سمكة فى اليد الأخرى
يقذفونها فى الهواء
فتطير المناديل البيضاء نوارس
تلقم الأسماك الطائرة
ثم تذهب بعيدا
كالموج
النورس يحمل روح مسافر
و عند نقاط الوصول
موانئ و حجارة
لا تصلح للطيران
فيصبح هراً
يأكل الأسماك
و يحتفظ بأرواحه الأخرى
للرحيل القادم
...
إيناس البنا

شيفون

طول عمرهم بيقولوا وحشة
و إن كل الناس جميلة
و لا حتى نافع أبقى نغشة
فبقيت ثقيلة
يبقى جنبى قطر فايت
سكة صاحية و عشرة نامت
يبتسم لى
و رمشى فاحت
ف الطريق أساسات عمارة
شمس تانية تطل فجاة
يبقى حلوة
يبقى من حقى أحرك ف الستاير
و أحس بنعومة "الشيفون "
على طرف خدى
جوايا طاقة رفرفة
مش عايزة أهدى
و أستنى وردة
تحكى لى عنك
أو تخطى قرب منى
شِرقت منك
وقعت عنيك تحت البلاط
سهم روحى عداك و فات
و رجعت وحشة
يا كدبة المرايات
جوايا قلب نيران صديقة
و الخطوة كانت بجناحات
فتحت سما
النور أسامى
زى خيط بيشد بعضه
و بيكسر الإشارات
غمضت روحى
و نفضت إيدى
بنيت لقلبى بلكونات
و رجعت أبرم ف الستاير
---------
إيناس البنا

لكل العيال

انا ما عملتش واجب امبارح
اصل اليوم كان كله قصير
اختى إيمان جابت بنوتة
و انا خالو بقى و حدوتة
بس يا ابلة سماح النوبة
انا ما قدرتش ابقى صغير
انا ما عملتش واجب امبارح
واحد صاحبى كان متخانق
كان مضروب و كمان متعور
قالى ابويا استنى معاه
يمكن يفرح من جواه
متشين كورة و كان متغير
و انا ما قدرتش اجيب ألوان
اصل ابويا كان تعبان
قلت له ممكن
قالى حبيبى
قلت سلامتك م الاحزان
انا مش عارف ليه الزيطة
لما نعلق صورة ع الحيطة بشريط إسود
قالى ده عمو و جدو و تيتة
قلت له بكرة ها اكون ع الحيطة و اشوفهم يعنى
شدنى ليه و بكاه غرقنى
و انا كان نفسى اشوف الفول اللى زرعناه
يمكن الاخضر يطلع منه
دمى يا أبلة شق الطين و إستنى معاه
---------
إيناس البنا

أولى

إرسم مربع
و نط زحزح ف الزلط
الأولى مش ف النطة
لا
الأولى إنك تحدف الخط الغلط
تلعب معايا ..
كان قلبى بيوقع قلم
تبتسم فتحة ف قضيب الدكة
تخلى السكة
يبص ف عنين الولد
و يشوف حكاية تلخبطه
من لخمته
لف اللى فاضل من عنيه
ف ضلع المربع
و قفل عليه جوة حوش المدرسة
البنت ساقية
بتحب ترفع م العيون كلمة هوا
و تلف ترميها على أرض جواها حروف
متزوقة
يرتوى ع الأرض عود أخضر
يدق
تفتح الورقة
مش ورد لكن طرحت عيون
بيسبقها الفزع تجرى
كل اللى عايش فوق غيطان الأرض
يحدفها
الملح يحرقهم
ملحت توبها
خطوتين
و الملح نشفها
.......
إيناس البنا

دمعة عيال

مش قادرة أصدق
دمعة عيالك جوة منك
كل النقط كانت قديمة
جمعتها
كانت ضباب
شفته سحاب قبل المطر
و ضحكت ياما و فتحت إيدى انتظر
ف إتشققت منى الساعات
صوت التكتكة
كان اعلى منى
و خطاوى جنبك رجعتنى
غصب عنى
ممنوع أعدى خطين ف سكة لونهم أصفر
ما أقدرش أزق الساعة
و أخبى منها فتحة سما جواك
نعيشها
و نقضى روحنا نهار
الوقت ضُهر
و الشمس جنبك
مقتول يا ضلى
لازم تقف بره الصور
قلبى فانوس
و الليل أسامى قريبة
نفخت فيه و طفيت عيالى
يمكن عيالك تبتسم و تعيش ف حضن الشمس
......
إيناس البنا

ثقوب

أنت برئ من ثقب ملابسك
من خطايا لون مبهج ينسكب ببصرك القاتم
فتصيده من ثغرك ضحكة قافزة
وتمكر عينك بالمارة
فتغمس قلبك بسائل حلم متبل للطهو
و عيون أخرى تتلذذ بك مشوياً
فيلعقون أيديهم برائحتك التي لم تكن بعد
و يأكلون صوتك البائت من اليوم الماضى
انت برئ
تعزف الناى بأذرع صبار أخضر
اللون الأخضر يشتهى لعابك
يزحف لمزيد منها
فيعرف منك التذوق
و أنت  تلقم مرها 
يبدع اللحن رغما عنك 
تتركك آه كشهقة موت
كالبكاء
فتهجر الناى 
و تختبىء بإبطيك 
كى تنبت الأخضر و.. الشوك
أنت برئ
فابتسم لعبث هر صغير يسكن لأطرافك السفلى ليلعب
هو لم يبدأ الفطام
و أنت تمتلئ بفتات مواء طازجة
فاعترف بموائك اللقيط
و استسلم لشعور النشوة عندما تحك رأسك 
فيسقط منها الآخرين كبراغيث مذنبة 
أنت برئ
فالراحلون يقفون بثيابك
يتنازعون ميراث اللون الأسود
و السماء تمطرك منهم ثقوباً ........؛
إيناس البنا

" آليس "

يمكن " آليس "

تعبت بقى م الزحلقة جوة الحيطان
قالت له يا اسمك ايه
..ع الشمعدان
ختم المراية ألعوبان
إوعاك تنام
و تسيبنى صورة محبوسة جوة
الختم نام
و زارها هو
فيه جناح غريب بيشق طوق فستانى الإسود
أصل و صور
صورة بتخطى المراية تسلم له الإدين
و صورة بتنقط كلام مية عنين
تسأل على العلامات
يخاف الحلم من صوت السؤال
يمحى الصور
و الأصل بيلم الحجارة م الرصيف
بدل الصَدف و يوشوش السكة / المراية
يا أبو قلب طيف
مجذوبة روح بتغمس الأحلام رغيف
شخبط ف صورة الشمعدان
إنزل معايا
و تبدأ ال " آليس " الرواية

(حدوتة مراية و جنى )

المراية بداية بنت بتبص لنفسها

بتكبر

المراية حيطان آليس

تلمسها تفتح

زى طاقة من خيال
تشوف خيال الجنى جارها تتفزع
تلاقيه معدى بين هدومها
مطوح الجناحات
و يزقها جوة الملاية
لو تستحى يلحق يخونها
لو تستعيذ ترعش ف طلعته م البدن
المراية ورق لنتيجة صاحية بتشوف عنيها
تجاعيدها المزنوقة تحت الرمش
و خط نازل بيقول يا بسمة ف الشفايف إحتمى منى و لمى ضحكتك
من يوم و رايح خبى الصور عن سِنتك

تضحك كمان  بحكاية منك فيك

يا ألعوبان ..:

و إن تسأل عن الجنى 
إحم يعنى 
أقولك هو جنى أصيل 
سايب معايا لمبته 
سايباه أنا يعمل أمير 
بيرسم الحرفين غواية 
قدام مراية
واقف ما بينى و عكس صورتى
بيشدنى جواها و يشدها لبره
واحدة زهقت م القزاز
و التانية مخنوقة ف هواها 
لما نتلخبط سوا
يلفنى بملايات
يقرطف ف الجناح
لحن و أغانى
و أرقص معاه
لحد لون الريش ما يظهر
نفترق
و أحدفها تانى جوة القزاز 
يخاصمنى يوم 
و تهزه دمعة ترجعه 
يصالحنى ..برعشة المية ف طريق على جتتى
يجرى الكلام
ينقط من شعرى للشارع
يضيع
و هو.. ينسانى ع العتبة 
يحضنى آخر الليل 
يتعشى بدماغى 
و أنا قلبى دكان صور 
يعزمنى على قهوة 
و يخطف دقتين منى
أزق الساعة أكون عنده
فيقسم حلم ع الورقة
أقول تصبح يقول أحلى .........؛

وليمة

هو يبحث عنها لتلثمه
و هى تبحث عنه ليدارى سوءتها
خلف أبواب الحجرات البعيدة
ﻻ أحد يلتقى
ربما هو سجن آخر
ﻷمنية قضمت أسنان مُريديها
هناك عند إحتكاك السحب
درج معلق
وﻻئم ضوء
إنكسارات المطر تخرجها سبعة أطياف
و أشعة ما تحت العشق و ما فوق الرغبة
عاشقة التوجس ﻻ تؤمن بالأطباق الطائرة
فتقف على حدود المرج
ترقبهم
أجسام تنطلق كى يرديها هواة الصيد
و محبى حساء القلب الطازج
ثم ترحل
تعتصر الليل قربانا لفحيح الوسائد
و حين غفلة من السماء المطفأة
عقدت قلبها بأحدهم
و توالت الطلقات
.....؛

أسرار خريف

فى بلاد الخريف
خادم أسرار الأصفر
تمتد أنامله بأطراف الليل
يجمع كل عناق بالقرية
و يزف الرهبة
بعض حروف
يروى :
بعد إرتعاش الظمأ
تميل الشجرة تفترش الأرض
فيؤمن اللحاء أنها أميرة
فقط يسكنها النوم
يحفر فيها بعض رسوم حكايا لم تكتمل
طفلة .. الوجه به عينين بلا ملامح أخرى
عيناها لامعة
الخشب الأسود فى الخلف يجعلها مرآة
بنقوش مبهمة
ثم رسوم لحفل راقص
فتجاعيد تشبه الأوراق تنتظر
القطن الناعم يتساقط ذات برودة
والدثار الأبيض يحتفى بتزلج أصواف متحركة
_لا دفء بعد
_هو قادم لا أحد سيوقظك سواه
خطوة ظلال رمادية
- هو ذا القبلة المقترنة بالماء
وشم شفاه
و أذرع إنبات تقترب
يهتز الأبيض
فينتفض الجذع
- أهى عصائر رغبة تندفع ؟
أم ..صفير ثم.. لا شىء
نفذ مخزون الصوت
و الوقت 
و هى بعدُ بقايا حطب تتخبط 
كى تلقف زحف الصوت
تدمع فى صمت صغير الشرر
و الطائرات الورقية داخلها
كفراشات نار
ترقص لأجنحة اللهب
ثم تحترق ..........

عتبة

_ _ _
وقف كل كلام ع العتبة
مش محتاجة عناد و خصام
أنا قدامك فاترينة
و توب أبيض
إيدى تقيلة و إيدهم خشنة
و اللى حبيبه بحكم العشرة
بيقومنى
و دموعهم بتغسلنى
إدخل إلمس جلدى الحى البارد
يمكن نفحة روحك
تقبلنى
ضيف على حلم
أفهم منه سبب البعد
لكن يا صديقى الجوانى
هلال العمر التانى هناك
بيفهمنى إن الأسباب
زعلت منى
و لا عادت فواتيرهم تخدمنى
الأصوات مش راكبة على خناقة
ده صويت ميت
يا آبا تعالى
و حضنتكوا يا ولاد بعنيا قبل إديا
زحمة حارة ف عفشة مية
زقزق فار نطوا الرجال
فضوا الكوكب من حواليا
.........

مزلاج

عندما تتحرر منهم إفتح النافذة
صدأ المزلاج الخشبى يبدأ كعصاة المايسترو
تنبيه لحواس صدئت كالمزلاج
الطفلة تستعد للقفز
و الشمس تهب وعود الضوء
تأهب
ثم إستقبل ذرات الغبار المضيئة و إستمع لعزفها بيديك
.......

إشارات

قبل المنام
إشارات كتير
حكاياتهم المدفونة صاحية
ضمة لروحهم ف لمسة زى الستاير
يرتعش فيك النسيم
لحد رعشة طلق روحك م الجدور
و أسامى واقفة
ع الفرن جوة مخدتك
طوابير
تتمنى حصة حلم أخضر
قفلت رموشك
و حديد بيسحب ف الهوا جواك لنص الأرض
كل ليلة تغرقه بمية عفاريت
يصدى
يشنكلك حلم بزعانف
تعوم
يردك النفس للشط
و برضه تصحى الصبح
خايف

قمر

و عنها وكانت بتلبسنى كل قمر
و أقول يمكن دى ليلة العيد
تقول جايز زكا المحروم
و أحلف لمستك بيا
بلاش تدفى بالمية
يا ألف بداية منسية
ف طريق كحلك
مراكبيا
و رسم عنيكى يتطوح
من الأحلام
تلمى الصاحى بأديكى
و يسند قلبك التوهة
يعلم خطه ع المرايات
و لو قلت لشفايفك لوم
و أبص لها
ها تسقط روحى ف المسافات
و أتوه منها
....؛

عبث

....؛
أغلقت الباب
فانعم معها برجاء مازال يأتى
الأنف دليلى الأكبر لحواس خمس معطلة جميعها
إحتلال الصفات يا سيدى عبث
و أنا أحتال بلقب الأنثى لأخفى عورة الذقن الأبيض
آلة جز الحشائش لم تفلح بحدائق الشيب
و كذا لم ينجح الحاتى بتجهيزى للشواء
لا وجبات منى تنتظر شفاهك
فأرحل
و فى الخارج
أطلق عينيك الجائعة خلف الحواس
و تبخر
هناك إضاءة خافتة
لقمر لم يعد يتبعه سحب ما قبل البكاء
يواعدنى الليلة
فأغلق الستائر فى حضرة شتاء
أضخ العشق بأمطاره
كى يمرض الصيف
....؛

مغناطيس

قطب زيك مغناطيس
كل ما تحاول تقرب
يتنطر على سكة تانية
تتقل بشوقك
نظرة فوقك
مشبوكة فيك دبابيس

فتارين

و نجرى و إحنامش فاهمين
و نفهم يوم
نلاقينا
هدوم صاحية بتتفرج على الفتارين
نلف السكة و نفرق ف أرواحنا على الصايمين
...

آهة

هى ذات الآه
أعرفها
كما كانت تأتينى فرادى بين جدران حجرة تتسع لها فقط
لم تختف ألوان ظلى من جفون لم تعد تراك
فقط هذا الظل لم يستطع حمل الرؤيا إليك
و الصوت تبرأ من الهمس
فأضحى قيد التصخر
...؛

محتال

أعلم أنك محتال
رأيت بعض روحك الملونة بالباب
قبل ان تخفى فيها الأزرق
و بعض الغيم الحالم
فتسلقت يدك الملوثة بالمطر و طمى أرهقته الجذور
لأزرع فيها عصفورة
...
إيناس البنا

زر تشغيل

و تدوس على زر التشغيل جامد
و توقف كل شوية
يمكن يشرَق فجأة "الويندوز "
يحدفه ليها من قلب الشاشة لحضن عنيها
بتشغله و بتمسح أى تراب من فوق
يمكن توصله رعشة إيدها يبص لفوق
تلمس شعره و تعيش جوة عنيه ساعتين
و بيرميها الحلم ساعات
تقرا شفايفه بتهمس رنة
عشق
بتخبيه منها السماعة
و بتتكلم كل ملامح قدام منها حتى و لو أستيك الساعة
.........
إيناس البنا

الليلة فوضى مواء

الليلة
فوضى مواء لا تحتملها حنجرتى
أمامى رحيل خطواتك
أصداف كنت أجمعها بعمر الصبا
من همسات شاطئ مغترب
يستصلح رمله بمياه العاشقين
يتنفس الحرف غنج الأمواج و هى تعبث بالأزرق
فيثمر
خطايا لحظى عند الزحف بزجزاج أعينهم
و ظل يصرع شجرة بجوار الأرصفة
لا تترنح
يناديك بعض خدش أظافرى
بطريق متعرج
الشاشة ترتعش لإنقطاع البث
طنين .. النحل النائم بينى
يستيقظ
و لقاء يومى بورق أصفر يكفى لصب اللعنات

رمش و جنى

غسلت الرمش و عصرته
و فوق النخلة نشرته
و سلم بعد ما قهرته من الدوخة ورا الملايات
تلف ف روحى أشباحك
شارع و حكاية م العلامات
تقولك" كش
و قلبى مراية من غير وش "
تزق بكتفك الطابية
"أوام ها نغش "
يا زنقة باب ما له كوالين
هجرت الصوت
مراكب عايشة ع المالح بقى لها سنين
تكلم جنى و تسيبها
تلف و تغرزك ف الطين

ورق

بأفنط كل الورق
و حدفتين للهوا
يشتاق للضحكة
يلعب / بورقى و ورقه
بيكسب
و يقش روحنا
بفوطة صفرا /نتمسح
و ينزل كل الورق ع الأرض / ميت

شمس العصر

الشمس بعد العصر
بتزق سعف النخل
و تطل نغمة بيانو
قلبك ف عنيا يعشقها
يطرح
الضى شافف بستان عنيا
مليان شواشى درة
بصيت لها
لقيتها ضحكة رمشك
معشقة بالضى
ضميتها و جريت
و بعد ساعات لما إستوى عمر البلح
الضل زحمة ف العواميد
إدين عيال طالبة الدفا / مصابيح
و العتمة تار
بتعس على دوسة الضى فوق بيتنا
و بتلمح الكحل ع الملايات
لمت نجومها
و شوتنى لبطونها
....
إيناس البنا

تانجو

تعزف دقات سريعة
رنة كعوب ينصهر الخام الزهر بروحها
تقترب
فتحمل الأرض ريشات من ألوان طير
و ذخائر حلوى
تمتلئ بها خزانة وتر خامس
لكمان يضرب سقف القلب
ثيابك آثمة
تمتزج بلذة رحيق برتقال
لم يأت موسمه بعد
أوقظ يدى
فتقفز الموسيقى
أغمض ثمارى
و تمتلك الصفحة روح التانجو
........
إيناس البنا

 

رمل

على حدود الرمال
الصبر ربما يحمل زهرة فى يوم ما
و تحمل "ربما" الكثير من الشوك
ربما يجرح
و ربما يعترض مجرى الدم
فيختلط بى
كى ينتج نوع آخر
من الشوك الناعم
و ربما البنفسج ينتصر يوماً
فيحيلنى للتقاعد
ال ربما الأقرب للصواب
أن هذه الألوان ليست لى
 

ورد

كان واقف ع الناصية بجلابية
أصلع و شواربه محنية
كان زحمة ورد
و ربيعى طريق بيرّوح له
يكسيه م البرد
قلب و متخبى بنضارة
مشدود ف ضفيرة و شوق ع القد
و لا عمر الشوك زق صوابعى
و لا حتى الواد قلب الشارع
لف و عورنى
سنتين و إتفردت كرمشة المكوة
الشعر قصير
و المشط مسلف للشوكة
قلبى اللى إتغير
و لقتنى ف بلكونة بيتنا
ع الحبل بنقط زغروتة
أحدف له عنيا و يلقفها
تهرب ع السكة
ليشوفها
يتغير صيف
و يروح ع الناصية
يكلم ف الورد
ويضم بإيده الورقة الناعمة
يتنفسها
نفسى يزقزق
و يطير يحضن ف مرايتى العصافير
يتلون ضحك شفايفى
قلبى اللى بيشغى كواكب حمرا
بيكهرب صورتى يدق زيادة
فأرجع تانى أطل عليه
يشاور بسلامه للخد
ألقى ف إيدى شوك م الورد
..........
إيناس البنا

 

ترجمة

 

عايزة تترجم كل صامولة ف حلم إمبارح ليه إتفكت ؟ /أول مرة بيظهر هو/ وقفت جوة مخدة شوكها تلف البكرة تعيد ف ملامحه /لأ مش باينة / من فرحتها صوت زقزقة بتقلدها / تقفل عصافير المرايات / تلبس فاترينة قزاز و تلف تعشق كل زوايا الحلم الصاحى بجوز حكايات





 

دخان

"عشرون عاما هى عمر آخر" .. إقتربت منه بنظرة شائكة جاهدت لتجعلها خاوية من الكلمات ، علبة سجائره الراقدة بمساحة الجيب العلوى قذفت طرف خيط لتغزل بعض الحديث .. "معاك سيجارة ".." إنت بتدخنى ؟ " تبتسم بغنج .."لأ بأكح بس " .. فيقهقه هو و يلتقط واحدة يشعلها لها ثم يبدأ السعال ليحرق الأدخنة النائمة منذ عشرين خريفا ...
...
إيناس البنا

جوانب أخرى

بركام الشارع
بصقة تالفة
لم تعد بنطاق الأفواه
و فردوس للتمليك
الفردوس من أسماء برج معلق
بلا سماء
يقطنه زكائب ورق أحمر
و فئات لامعة من أحذية بشرية
تحملهم حقيبة مصعد للخلف
الجميع يهبطون لحجرات مدفن
يبيعون أحشاء الموتى
و ماء مالح
و لا أحد يرتقى ثانية
الزحام هنا خائن
و الطاولات لا تهتدى لأرصفة المشاه .
أنتظر رحيق المارة
فتأتى أردية مستطيلة الكلمات
تنتقى منى رائحة شهية
يستبدلونها بوجبة الإفطار
و يمكثون جوعى
ثم يمطرهم النمش المقيم بالسماء
بنقاطٍ من الحبر الأسود
فيحتل الليل مساحات المطر
و تصحبه لسعات خريف تمتلئ بنوبات من سعال مزمن
تنفض أوراقى للطاولة
لأقدامهم
و يظل بعض منى عالق هناك
كبقايا من وردة وحيدة
....
إيناس البنا

مواء

نصفى الآخر يمتلك مواء
حيوات من الغنج
الشبق
و بعض القتل الأعمى
فى ليلة باردة لم يإت فيها الفراء
ببقايا رجل
أخدش بعض الرمل الناعم
كى يستيقظ نصف العقل
بعض اللون الأسود من محبرة
و مزايا الحكمة فى صيد الأوراق
يتصاعد عبث القهوة
و حرف مارق يتحرش بناصية الفنجان
يعجبه رحيق الشهوة
يعجبه صرير أظافرى
و شفاهي التي تلعق بعض  شوائب منها
ألعق ذاك الجزء القابع بجواره إمرأة تقرأ فنجان آخر 
تخبره عن بقعة مستديرة أنها لقلب كبير يقربه
فيختفي بفمي  المرأة و القلب و الفنجان 
أكره إهدار إنفراجة فمي
لهذا أكره العلكة
و أكره أطباق الفنجان
و هى .. للعودة منها طقس
يستغرق عمر خريف آخر
و بساحة نصف القلب
ما زلت ألعق خدش
لم يحلم يوماً أن يحتل مساحة ظهرى
أقضم بعضه .. و أترك آخر ليلتئم
..........
إيناس البنا

حالة معلقة

و عايش زى المعلقة ف الشاى
لا دقت حلاوة السكر
و لا دايب
و لا دماغك خدت نايب من الفوقان
يا ياسمينك ف قلب بنفسج العاشقين
و انا كنت ياسمين
قطفونى جوة الشبك
طازة
و عقدتنى ف خيطك
الإبرة جرحتنى 
و إنت يا دوب طيب
بتقلد الشجرة و تلمنى معايا
تناولنى بحكاية
لإدين ضفيرة
واقفة على السكة
ياسمين انا
وقلبى بياض فاير
بيخاف من الإشارات
و يدق ع الطاير
يرتعش صوتها بلمسة عنين
" الفل " يا عاشقين
لمض خشنة و بتقرب
تنقينى
و تعليقة يا عقد أبيض
على المرايات
بيجرى إزاز
قصاد عينى
و لا سكة تودينى
....
إيناس البنا

دندورمة

و اعيشها شريط دانتيل ع الكورنيش
برمشة طيش
تقول تطلب لى دندورمة
تنط لفوق عنيا بشوق
و اقول بشويش
أخمن روحك البسكوت
له شقاوة ع الفراولة
و تانى بولة قهوة يمكن أو شيكوﻻ
لون عيونك بنى و ف دلعك فراولة
و اللى ها يسيح فوق شفايفك من نصيبى
ضحكة نفضت السجاير من دماغى
فتحت جيبى
الشط تايب
مش ﻻقى غير صودا و سودانى
و قشر ترمس للحبايب
بأبص تانى أترها طار
قدامى طيارة ورق
حلفتها تدور عليها
و عيون ترفرف زى القماش فوق الشماسى ألوان كتير
مش لونها هى
مستنى إيه؟
جنية كانت !
ضحكتها عامت جوة قلبى
دخانها سارح ع البلاج
و رجعت أدعك ف الفانوس
يرزقنى جنية فراولة
و طريق لبياع الجلاس
.....؛
إيناس البنا

كنفاه

أرتق وسادتى بخيوط فيك
الأحمر يشتعل
فألثمك
حتى أعتصر الخدر
عيناك
تحمل رائحة البن
فتغار القهوة
من سائل عشق دونها
يفور رحيق مجونى
أتطاير
كحبوب لقاح
أقتنص شهيق
كى ينتشر عطاس النشوة بينهم
ثم أبرأ منهم
الآخرين و حمم التسلل
و ربما البعض يثمر
شفاه خضراء
فأعود لحصادك
اليوم بندول
و زاوية لعد الدقات
بضع و سبعون أمنية
لتسونامى يعشق
أمواج بلا أزرق
تضرب أجنحة غيم
يحملنا معاً
ثم يمطر
على حواف الصحو
تذكرت أنى يوماً
لم أعرف الكنفاه
ـــــــــ
إيناس البنا

طبعاً عيل

طبعاً عيل ;

ــــــــــــــــ
لما تلاقى زجزاج غامق
تبحلق فيه تلقاه بيتحرك
تقول دودة
يجوز تعبان
و يبدأ طقس دماغك يفلت حبة جنان
تبربش تاني تطلع فتلة
طبعاً عيل
و أما تصدق تلقى أخوك أو إبنك مثلاً
ماسك "بوزو" بقشر سوداني
تقفش فيه و تقول علشاني
و لو شيكولاتة
تبقى الليلة هزار و أغاني
طبعاً عيل
لما تحبي كتابك جداً بالشقلوب
تضحكي مع مشهد مكتوب
تسهري ويا الحلم ف صورته
و بتحضني قلبك مجذوب
ف قلب مراية يتبدل قلب الخساية
بصة كمان
عاجبك نكش الموجة ف شعرك
و أما بتمشي وسط الشارع
الهوا لعبي يعاكس نبضك
نص عنيكي تكون مقفولة
تفردي إيدك حابة تطيري
شادة لروحك صوت عصافير
بتفوقي على فرملة السكة
و كلمة تصحي الروح زعلانة
طبعا عيلة بس جبانة
يا نسمة بحبك و بخاف منك
قلبك يعشق سرقة نومي
يبعت دقة تفك هدومي
و بعيش يومي زى المشبك
يمسك ف غسيله
تعجبه ألوان مش تفصيله
تنشف و تسيبه
و ألم هدومي بدبوس مشبك
ليه كل ما نكبر بتلعبك
كلمة و تاني ف نص السطر
قابلت حرف
بيوزن المرايات
زغللت
شفته جوة الحلم جنبى
و أما قمت فركت عيني لقيته لم الضي عنده
ضحكت منى ضحكت منه
و اتحدفت ع القمر دمعة
كده تعشق يا قلب العيل الأحلام
تخاف تمشى ما بين الليل
تزق ف ضحكك العتمة
عشان بتخاف
تنور ع الحيطان قنديل
نهار العمر لو يقصر نهارك غاوي شمسه تميل
و يتمرجح و بأتمرجح
يا حضن خريف
ورق اصفر
بينزل الشجر ع الأرض
و تعشق خروشة صوته
ف تتمناها خيط فستان
تلم الشجرة فيك م البرد
و ترجع للأسامى ف صيف
تقول يمكن ده كان توهان
خلاص الصفحة و الألوان ده كان بيعدي زي الضيف
ده عيل قالوا كان فنان
.....

#إيناس_البنا

روح تايبة

بتتحايل ع الروح التايبة ف عفاريتها
لتشد الباقى
واقعة ف فنجان القهوة حياتها
و بترقص يتنعكش وش
و يلم الباقى شفايف روح باردة
بترعش من لقطة أحلام
و عشان اللى بتقرا الفنجان
بتغش
بتلم بصوابعها زجزاج البن الصاحى على حيط الفنجان ما غرقش
....
إيناس البنا

صدأ

لا أحد يلتقط زخات مياهك المالحة
فلا تمرض بالصدأ
فى عينيك مياهٌ أخرى
آبار تومض فى الصحراء
و الشمس جبينك
فأقتلهم جميعاً بالعطش
...
إيناس البنا

فيلم قديم

فهمونا زمان إن غنوة الفيلم دايماً للحبيبة
و صحينا بعد الغنوة بنغنى
و كل بنت جواها صورة م الفيلم
بتتحرك
بتروى الحكاية زى زرعة قلبها
و الحكاية أصلها ليلة ب ورقة نتيجة
بتتغير
كنت بأكرمش الورقة و أرميها
زى برضه فيلم قديم لكاتب فكرته تايهة
بس كرمشتى إنتقام من يوم خنقنى
حالف ليعمل عقدة
وينط فوق الحل و يغميه
بأقفل عليه الحلم يفتح لى
ماسك إيديا و مركز على الننى
و فريد "و حياة عنيكى "
حضن و يقول " مش كفاية"أصحى من خوفى
و أكتفى بالحلم صابح
كل يوم يشرق معايا و ينطفى
من كام سنة
نجمتين الحلم هربوا
ماسكين ف سيرة مين عايشنى و مين أنانى ؟
بليت ف أستيكة و مسحت الضى
و نزلت ع الأرض فارد إيديا بحضنها
النخلة زقتنى
مسك فيا البلح
وزى اليويو علقنى

إسمك ما سرقنيش
إسمى اللى ف عز الطلق
كتب ف ميلادى
بنى آدم
تحت التفتيش

إصطباحة

بتلم شعرها المنكوش ف فيونكة مرسومة بقلم جاف
تبص ع المراية و تقلد تمر حنة
" تتعب يا وله "
و بعدها تمسح النضارة
و تصب قهوة الصبحية جوة البرطمان
تطير
و صوت فيروز ف دماغها بيغنى
.. ....؛

مرجيحة

و متشعبطة روحى ف مرجيحة
خشبة من غير حيطان
يمكن تزيق تعترض
مش وزن عيل يا أسمِك إيه
لكن بتعشق خطوتى
بالليل معادنا
لما بتستخبى عيونه
ف "الكافتيريا"
أعرف إنه خلاص زهق
أخلع التوب الحرير
ألبس التوب الضفاير
و أجرى ليها
تفتح اديها ال حديد
تضم
بأدف تطير
و لحن بيمطر م السما
نرتوى
و ننام خفيف
تزق سنين بلون غامق
يخاف الليل من المطرة
و م الطيران
و تنزل الستاير ع المراية
بأقفل الصندوق على المشهد
و أخيط روحى ف حكاية
و أجمل خشبة عصفورة

شباك

الشباك ده
بيفكرنى بشباك بيتنا زمان
و أنا بونبونى
كان يفتح على طاقة شُبان
عارف البنت المكسوفة جداً
لما بتبقى ستارة خفيفة
لبنى و بجناح سوليفان
شوقها يعدى / يجوز طيران
تلمس فيه ضى الضحكة
بتحب الشيش مفتوح
و نكتة تدفى خدودها
ف عودها تدندن
فكت كل زراير اللهفة
تتنحنح
و تلم ف توبها
طلت تانى ترسم شعر و دقن خفيفة
و تلوم نفسها لو يلمحها
و بتتمنى يا ريت يلمحها
هى الطلة دى آخر مرة
ترفع رمش تنزل عشرة
بيبص لها
يا وقعة مليون لحن ف راسها
عنيه تتحب
ردت زى الطلقة ف قلب
و درابزين الحلم شبكها
قبل ما تتكعبل و تطب
سحبت روحها
و رجعت لكتاب حيران من حالها
كل يومين يتشخبط قلبه بدوايرها

وطن

وطن عاشق ما كانش معاه غير تمن تذكرة مرسح
شبك ال "بهية " فوق دراعه
ترجم ف شوقه بغمزتين
دعك الفانوس
طلع الصنم
و قال يا شبه محترم
ممنوع دخولك
و إزاى و ليه ؟
أصل البعيد كان جاى حافى
و التذكرة بقزاز فيميه

عنب

العنب البناتى ف قلبك يوماتى
" حرج عليا بابا ما أروحش السينما "
تقطف لها فاترينة ورد النيل و تطير
قبل ما توصل للشباك
تلمح ع الناصية التصاوير
شالها حرير
طرفت روحك
و جناحك مخلوق عصافير
روح و التانية
تلقى الحلوة ف كادر الشاشة
ورق مناديل

فار

السلك اللى محاوط بيه ع القصة
قرقضه فار
طلعت تتدارى الحدوتة ف قلب عيال
شدوا النبلة و طوحوا فيها
و اللى قانيها
ربط الشاش ف دماغه
و قفل الجرح عليها
....

زى البحر

بهتت شفايفها على عنيا
عشقتنى  مدن جنب الكورنيش
و أنا قلبى دواية بتنور طيش
و غوانى الفرن بشكل العيش
و ترد عليا :
....يا رغيفى يا جعان تحابيش
فك الدواليب اللى ف رسمى
طلع بره الشوق اسمى
الشمعة بريئة من الإحساس
و الهوا عصفور واقف ف اشارة الأنفاس
بيرفرف
كام ثانية
و يقعد ع الدكة يخرف
عارف لو دقدق ف الطيران
ها ينط صاروخ بره الكوكب
يغدر به الهوا و يعود للأرض
يفرد يده ما يقابل مد
ف يلف مدار يمكن يتهد
و إنت ف قلبك زى البحر
شايف الموجة بتشغى جنان
يبقى شاريك الهوا يا فلان
فجأة يسيبك لما يعدى باكو لبان

أحمر شفاه

أحمر شفاه ...؛
أحمر شفاهى الجديد أتمنى أن يعجبه فأنا لم أصبغ شفاهى بهذه الدرجة من الأحمر من قبل "فاقع قوى " ثم أعود للمرآة لأطلق خصلاتى المموجة مع نثرة عطر على جسدى و الرداء ..نظرة أخيرة ثم < قبلة طائرة > و أخرج للردهة ..لم يتحرك أو ينظر تجاهى يبدو مستغرقاً فى أمر ما .. جلست قرابة الساعة أمامه و لم يلتفت إلى "و لو ..لن أهتم ".. و فتحت حاسوبى إعلاناً منى باللامباﻻة.."مساء الفل بقى تحت النظر إرمى لى نظرة و إﻻ إبتسامة حسنة و تنفع يوم القيامة تررا"...كانت هذه كلماتى ف رسالة بعثتها إليه على حسابه الشخصى بال "فيسبوك" و إنتظرت الرد طويلاً و بعدها نظرت إليه معاتبة و .."تشرب قهوة معايا " و دمعة تنذر بأخواتها مع خطواتى للمطبخ و لمسة للإطار المعلق يعلوه شريط أسود .."أكره هذا الشريط "
.....؛

حنفية

كل الموضوع

إن دماغي تحت الحنفية

بتسقط منها أسامي كتير

بتروح ف الميه

و صابونة شاهين بتحك ف فروة راسي

زى الصقر بتنتف جدر الشعر

و الأحلام و تظبط عش مقاسي

إحترت أنا مين ؟

بيضة ف عشة

و إﻻ ف تربة

و إﻻ أنا سكة ف زحمة رجلين

تحت الحنفية

لسعانى الميه بقى لها سنين

لما بديتها

كانت الشمس ف عيني بتلمع 

كنت بافتح و لا اغمضها

ﻷجل الدعوة مكرمشة يا أمه

تايهة البوصلة و بتشرق على ناس تانيين

آخر التوهة بربشت و غمضت

مظلوم إنت معايا يا وش الأرض

شقيتك بالطول و العرض

كومت الصحرا ف قلبي

كبرت فاتورة برشام الضغط 

شمرت 

و بعزم ما فيا عزقت

بعد الفحت و الدوس و الشد

 زرعوها بارود 

لميت الغلة و زغرطت

بعيار طايش عورت سحاب 

و الفرح اتكلبش قبل ما يوصل للباب 

هربانة حكاوي من غير ميه

عملت بدموع الناس   حنفيه

خدش

لعب العيال ف الحوش حياة
دوشة
مش قادر أغمض عنيا
يا ولاد بهية
صوتكم عنيا
و ندهتى بينكم محشورة بين طوبتين
الخطوة فوق قلبى خضار صاحى
رفرفت بجناحى
طخ الهوا عيارين لفرحى
طايش عيارك
و زادوا ف التراب / صاحى

بلحة

و البلحة حلوة و غندورة
كان حلمى أرسمها ع النخلة
طارت سبقتنى العصفورة
وقفت بتحَجز ع النظرة
لا منها قادرة تقرقشها
و لا منها خرجت م الصورة

 

يمين

قلت إحلفى و النور قطع
و الشجرة قدام بيتنا عاشقة خيال الضل
رسمت ورق عصافير
و ضى مراية شمس
نطيت ف دوشة عيال يتونسوا بصوتهم
بتغمزنى المراية بعِرق قهوة
زقزقت
صفحة سما غامقة
على كفها الحواديت
بصيت
و يمكن طرت
و حلفت لك على ضى نجمة مضفرة المرايات
إنك ..وشوشة بينى و بينها
و حضنت النجمة عنيا حرقتنى
و زعيق عيال م الحلم زقتنى

صبار

صبار زمانك
كل ما أقولك روحى ثوانى
تجرى و تقطف شوكة عشانى
رحت أوصى الساقية
-وقعت ف عرضك مية ف أرضك
فلتت منى بضحكة عويصة
حدفت كام حلم ف تقفيصة
-أصلك طالبة فوق العادة
أجرى محطة زيادة
أدهن حيطة بلون شفاف
يمكن غيط الورد يعدى
يلمس خدى
على صوت صفارة شديت يدى
و وقعت
لما ألمسك و أنا نايمة تانى
إقفل الشباك و خيط ف المخدة عيون
شفايف
و إوعى شعرى يبص خايف
خطوتى تصدق و يمكن تتفتح ف القلب وردة

برواز

و بروازك اللى قماشه فانوس
ينور
يدور
فيهرى ف قلبى يسوى الغموس
عارفنى بألاوعك
و تجرى ها أطاوعك
و مساكة نلعب ف زحمة تروس
تزقزق لنسمة
أحدف ف صوتك
بورقة و ننى
تكرمش عنيا و تدارى منى
أقول غصب عنك
تقول غصب عنى
ألون يدينك بأحمر شفايفى
تلون عصيرك و تسقى ل طيرك
أقولك يزيدك و ألمع ضوافرى

ضحكة

ضحكة عبيطة على وشك و إنت بتتفرج على فيلم رومانسى تتنطط قدامها طفولة الدنيا و عنيك تبربش فلاشات بصور تانية و بتربط نفسك بدوبارة علشان ما تطيرش و مع تتر النهاية بتجيب دبوس من روحك و تفرقع كل البلالين.. ..حالة ناس كتير بتعيشها

قلبك رنات

بيضخ ف دمه ساعات
و بيفصل شبكة
يقول صدعت من الدقات
و ساعات بيحب يغير رنات
واقف ع الناصية قصاد منه
حريف نغمات
كل ما بيقرب من جنبه
يلاقيه بيلق
زى اللى مخاوى
و بيرقص تعابين بصاجات
يتلخبط رسمه على البكرة
و خطوطه إشارة
بتهنج
بتحاول تمسك ف الشَرطة
يتكهرب فولت على الهادى
نفسين و يلمسوا دخان
فا سرينة إسعاف طيران
و يقولوا يا شاطر
رخصك دى قناطر
إركن على "منيو" الشاشة
الروح عطلانة
و النبض عايش لك كماشة
شمر كمين أعصابك
و إشحن لك كارت يدق
و تعالى نزق

عيد

هدمة جديدة
و أنا قلبى شماعة فاضية
فردت ضلعى ألبس و أقول يا حياة
رفرفت زى الطير
جناحى كان حافى
فك الشريط الأبيض من على كتافى
شبكت هدومى ف السما
رهنت شماعة الهوا لإديا
شاورت صبية
لم الهوا هدومه
سافر وراها
و قفل عليا

بيت

هدوا الطريق و البيت
و يا زنقة المسافات فيا
على معبرك مليون طابور
ف قلبى نط السور
مقفول قصاد مقفول
مفتوح ماسورة بندقية
عديت لباب السما
و طابورى ف إديا

كشكول

كشكول قديم
بينز حبر أحمر
كان قلبى عامل نضارات سودا
و مستخبى
كان حلمى جمرك
يا صبرا
يشتاق لدمعى
هربت منك
حسبة سنين
غصنين زتون ناشفين
و كل ما يهج اليمام
بتموت عنيا و تنطفى
زى جثة طفل مادد اديه بيشد المطر
ﻻ اديه بتوصل و ﻻ جدره بيشق الحجر
... ؛

فاتورة

الزوايا مشفرة الكادر
و مقيدة الكاميرا بقماش
صعب جداً
تنطلق من بين شفايفك
ضحكة فلاش

زاوية "فرج "سنتها مكسورة
و العاج طريقه إتزنق
ف مسيرة معصورة
غسيلى نقط سمك
و المية محسورة

محشورة إيدك ف الدعا
بتضيق البيبان
تخطف حدادى الروح
الغنوة م الغيطان
    إفتح
خبطتين و إفتح زمان
سمسم يا عم بلاش جنان
مش ناقصة تتنيحة بيبان
زقيت و نص كتافى ورمت
و ندهت لما جيرانى صحيت
__..👮;
.. إضحك بقى يمكن ده عدس
أحفر يا أفندى من تحت شق الحيط
تعدى
و بلاش تدوب ف المصدى
لم الشبك من نيلك المليان سكك
و إعزم لى حيلك ع الدكك
إدفع يا أفندى
و إن حد سألك   فاتورته عندى
ــــــــــــــــ

قشة

حطيت القشة
على ضهره المحنى فوق الشيلة
و إستنيت
يمشى ورايا لحد البيت
رفس القشة و جت على غلبى
قطمت قلبى
وقفوا دقيقة يكفنوا فيا
أكلوا عنيا
و لموا السيرة
و كمان أخدوا معاه تصويرة

مسحراتى

مسحراتى
بيصحى نور مقطوع من الخضة
ف يجرى ع القلة يشرب
و بلة صوت
تبدر العيال بلكونات
بتمطر أساميهم للطبلة
ضى ملو الشارع سيمفونية
إصحى يا عبد الله
يا عمو أنا أحلام
إصحىِ يا أحلام
يتفرج على زقزقة الفرحة ف عينهم
شربة يا ولاد الحلال
يرفع ف ريقه
و نقطتين يودعوا ب خبطة "ميكروفون"
وقت الآدان
يا حى يا ديان
الصوم جبين بينقط عرق يرتوى
و يوحد اللى لرزقك يحتوى

فيك حياة

فيك حياة و أنا نصى طالب م السما إنعاش مبكر
فيك طوق نجاة عقد إحتكار
حرفين و خايفين لما يصحوا السطر يقفل
سهرة عيون معتقة جوة القزاز
صبيت لى كاس
ضحكة عنيك
نستنى طول البعد فيك
و خرجت مطوح بأخبط ع الهوا
فتح البيبان بصيت
لقيت الحيط ف ضهر الحيط

طيرنى الغربال يا عيونى
تايه ف العمر و قلبى ضعيف
القشر ملانى
و حب العين الإسود غطانى 
و بياضه إتحاش و الخرم كفيف 
لساك بتعافر ف التلافيف 
يدك تبدر الإبيض
ع الطين يخضر
إزرعنى و لم شباكك م الغربال
يا تعيد الطير م الهجرة..لمعاد الأرض

ممسوك ف خانة الياك جنب الصفحة 
عينك ف عينى تتمايل مع اللمحة 
إتكاترت البراويز حالفة تشيل إسمك
لفة تطير قدام و يعيد القشاط رسمك

فات ياما ع الغيطان
كانت تضم العيون 
عهد إتقسم
و العيبة ع اللى يخون
طالت حدادى الغربة موالك
حصدت زرعى
مديت مواسم الإنتظار
مِلح اليدين طال العيون
و الزرعة شاخت 
شديت مراسيل بالمطر
يندى فوق جبينك
لمتنى يابسة
و بعزم يدك
طوحتنى جوة السواقى
و غرقنى نيلك