فيك حياة

فيك حياة و أنا نصى طالب م السما إنعاش مبكر
فيك طوق نجاة عقد إحتكار
حرفين و خايفين لما يصحوا السطر يقفل
سهرة عيون معتقة جوة القزاز
صبيت لى كاس
ضحكة عنيك
نستنى طول البعد فيك
و خرجت مطوح بأخبط ع الهوا
فتح البيبان بصيت
لقيت الحيط ف ضهر الحيط

طيرنى الغربال يا عيونى
تايه ف العمر و قلبى ضعيف
القشر ملانى
و حب العين الإسود غطانى 
و بياضه إتحاش و الخرم كفيف 
لساك بتعافر ف التلافيف 
يدك تبدر الإبيض
ع الطين يخضر
إزرعنى و لم شباكك م الغربال
يا تعيد الطير م الهجرة..لمعاد الأرض

ممسوك ف خانة الياك جنب الصفحة 
عينك ف عينى تتمايل مع اللمحة 
إتكاترت البراويز حالفة تشيل إسمك
لفة تطير قدام و يعيد القشاط رسمك

فات ياما ع الغيطان
كانت تضم العيون 
عهد إتقسم
و العيبة ع اللى يخون
طالت حدادى الغربة موالك
حصدت زرعى
مديت مواسم الإنتظار
مِلح اليدين طال العيون
و الزرعة شاخت 
شديت مراسيل بالمطر
يندى فوق جبينك
لمتنى يابسة
و بعزم يدك
طوحتنى جوة السواقى
و غرقنى نيلك

يبقى ممكن أبدأها ي
يعنى أقولك روحى بتصبح عليك
رغم إن العصر قرب
يمكن أهرب جوة منك
و أركن الأحلام ف ليلك
بين عيونك لقطة أقرب للحنين
نغمة أعذب
عزف للأيام تقرب
أنقش الصوت ضحكتك تنده عليا 
يعترض نبضى ..يساهم سيمفونية
شوق و يقبل ي .. يقرب

الشاطر هلالى 
يصبغ كلام 
يبهت ف ألوان المنام
و الصبح بيلف قلبه
قرطاس ورق
بامبى و قال غزل البنات
مزماره يسبق خطوتين
يصحى السكات
تتلم حواليه العيون متبسمة
ينده يقول مسموح لى ألم الأوسمة 
نزل الهمام
عيونه تسرق الإبتسام
و النمل قام.. أكل الكلام

فارد غيطان قمحك على البساتين 
طارح يومين زهرك/ موالح
و يوم ف الدرة سارح
مواسم الخبز ملت الهجران
الحبر تاهت خطوته و إتحبست الألوان 
لِم عناوين السنابل قبل الحريق
مطرك ما عاد يسقى التراب 
رذاذ شاحب
و يطلع منه ألف حساب
يبعترهم ف عمر الليل
و يتاوب

لعب العيال شبابيك
و أنا قاعدة جوة التراس
متونسة بضلى
أستنى أشوفك تعدى
بس أنت ما تشوفنى
جاهزة و متسلحة بالنوتة و الألوان
طليت بطرفة عين
لقيت هواك طاير
و الحيط فتح له بيبان
عديت على ضحكتى
و إتبسمت توهة
دابت خيوط القمر
ف عيونى و الأحلام
حلقات و لف الكلام
و قفلت شباكى و مسكت ف الأقلام

وردتك
طرحت ف حلمى ورود كتير
جوة السهر قلبى أسير لدمعتك
نقطة ف عينى حنينة 
تشتاق عيونى ف خطوتك
لمسة عيون و أيادى دايبة 
ترسم طريق حاضن حريق 
و قلب جار الشوق معدى 
كان الهوى بستان قمر 
شبكت فوقه الحلم الأخضر 
طيرته فوق الضلمة يهدى
لف الغيطان
عمر إنكسر جوة الحيطان
نزل القمر من فوق .. ل عندى

مجنون و رابط ف الطاحونة خيوط إيدين متشبكة 
و غزلت توبك سنابل قمح 
عجنت قلب لعيون الخمير يشتاق
جمرة تسويه ف اللقا 
و جمرة حريق ف الفراق

نفسى أشرقك 
رغم الإيدين الممدودين من بين عيونك..بعد أو صرخة أنين
و أمحى الأسامى الهربانين لبلاد جفونك
عطشان أكون نيلك و شمس حنينة تصبغ ورودك 
إتبسمى 
رمل الطريق مستنى يسمع غنوتك
و خضار يعدينى لحدودك
أنفخ غبارك للسما 
و ألمس غيومك تبتسم
مطرك يدق الأرض نبض و يترسم أوراق ربيعك جنتى 
يا طيف زحام قلبى وريد بيكملك 
بس أشرقك

شايل قلوب متقسمة حبر و عيال
نفض ف ورقك م الأسامى و م السؤال 
لَم الغرام بفرشة منقطة 
شهرين و إتلونت الحيطان بالشخبطة

تحيا الغناوى اللى جاية و اللى فاتت لأ
إحفظ النوتة يا خِلى 
لِم الورق بالعصا 
و نجيب ما لوش عنوان 
ناصر معاه الحق
ساقية تلف تعاودنى 
مية بلون الدم
مفتاح بقفل حديد 
زنزانة ف ضلوعى
و أرقص ف يوم العيد
حرية لدموعى

الحلوة من غير عنين 
بس الرموش آية 
خطوتها لون النار
رجليها خلخال دهب 
سحرت أسامى و إيدين 
و القلب جمرة حطب 
و اللى ينول الوصال يرافقها ف السكة 
يوهب عنيه للنار و الدهب غاية
يستنى طلة غيوم 
يملك به خلخالها 
طليت عليها أرتوى
و عيونى مشتاقة
لم الهوا المناديل
و قفل لى شباكى

و ينطق حجر 
إغسلنى من ريحة الوبا 
لونى إنفجر أحمر و قلبى بيختنق
عنيه مش لاقية المطر 
يا عيون كتير قفلت شبابيك الحياة 
إتيتمت ألوانى بدرى 
و الأحمر مش طوق النجاة

الراجل بتاع العرقسوس 
زينة مكان 
مليون فانوس 
و بتاع بيتنطط ورا شوية بتوع
هزة إيدين و الوسط واجب 
شنكل و بيرقص حواجب 
خيمة ليالى منقطة أحمر 
حفلة لشهر الهلال 
مين اللى قال إن الموالد معجزة ف الفن أو ف القزقزة؟
مين اللى حط العرقسوس جنب التيوس ؟

و سنية تلملم قصاقيص التوب 
ترسم ال حروب ف دواير كرانيش 
ضلمة و بتهيش 
قفلت عراوى 
و زرايرك تايهة ما بتجيش

كاتشب ولاد الذوات ..من فوق الوش
و البيفى حظوظ
مفرومة يا سيدنا و مستنية حنية تقليبك فيا 
العيشة طبيخ 
و الصلصة أختام على يدى 
الطين واحد/ نفس الزرعة 
الأصل الصلصة و الكاتشب غش

جوازة 
ــــــــــــــــــ
الحلو قال تتجوزينى 
و أنا قلت YA SO PEACE يا عينى 
منظر و لقطة و العيلة ميرى
شديت حبال الرمش طرقع 
نفخة كلام و لسانى فرقع 
نط الشاويش م الفرحة نقطنى بخراطيش 
وقعت حواجبى و قال يا قطة متخربشيش
و يا PEACE ما فيش

عايطة سنابل عجاف / معرقة بالدم 
القهر مالى الدفوف / دقتين 
دقة الأفراح تغنى 
و دقة اليتم الحزين 
و الشوك سابقنى بخطوتين

خطى فوق العتبة 
بسم الله 
يبدأ الحلم النهاردة طرح بدرى 
قطفة ندى زرع الجبين 
موال شفايف و القلب شافف ضحكة عيون 
سلفنى ساعة ما إشتهيك آلة زمن تعاودنى ليك
شبكت نخلك ف الهوا ضمة ضلوع 
و النبض طايب 
و إستوى بورقة بارود 
خطى فوق الميرى سمى 
غيمة نطت بين كفوفى 
قيد و لامم فجر جوفى

يا صندوق الغوايش يا فرح البنات 
نعكش و نقى /ألوان كتيرة 
كله فالصو صفاره عيرة 
كسر المرايات و شكل من جديد 
فك فوانيسى النحاس 
شبك خيطانهم بالدوبارة 
تطلع عمارة و إسورة آخر عجب 
بس من قلبى إتوجد 
كل جزء له حكاية رغم إنه جديد لكنه كان معايا م البداية 
إيدى طرحه اللى إتولد / بكرة ها يكمل غنايا
لم كل مراية ضلمة و صحى شمس تعيد لقايا

حبر بورقة على بياض بتبيع أموات
دحرجنى لمونك 
و الحفرة على جبين الصحرا تضم 
لسة كمان حبة دم على ما الكحك يلم 
أحمر طازة و سكره هم
ليلة العيد 
إشترى بدل البمب رصاص 
إعمل قناص 
و قبل ما تخرج فك اللمبة 
و نشن ف الحلم

و أحس إن كل المناظر شقيقة 
غناك وسط قلبى 
وميض وقت ضيقة 
و أعيش التمنى و فرحة لدقيقة
يعوم فيا شوقك و شوكك يجدف 
ووصلة خيالى ل برك غريقة

سحابة صيف 
ــــــــــــــــــــــ
شايفة ملامحك ألوان 
دخان 
عيون صاحية بهلال مفتوح 
زحامك آخرته شباك 
ف طلة ليل يخربش جوة منديلها 
وشوش عطشانة للأحلام 
يدور أيام فوق المواويل 
يقوم الصبح ينساها 
و يقفل خطوته و ينام
مكتوب ف بطاقة مواليدك إسمك و غناك
حل الدخان من على صدرى
و إستنى هناك

المواطن إكس مات 
صورة مليانة حكايات 
على جنب يا أسطى 
ده شهيد بشرطة 
علقنا صورته ف المحطة 
و التانى مضروب ف الوكالة 
و تحت سلم شحنوه ف بالة
و عروسة نيلى تستنى جنبى و تشتكينى 
تسأل عن المية اللى وقفت بعدها 
من عمرها و شابت سنينى 
و الفرق إيه يا عيون ف حفرة ؟
واحد سما و التانى علمه ف السما

تِلبسنى توب 
تِقلعنى مية
صدقة هنية 
و الإسم إنى واحد صحيح
أعشق خلاصة 
ترمى القضية
وزعت عنبى فوق الملاية 
مستنى سلم للنهاية 
و بداية العنقود عصيره 
و أخره ملفوف ف الجراية

مسموح لى بس أبقى حفرة ف خطوتك
تردم عليها البسمة و الشوفة 
ممنوع عليا القصر و الأقلام 
مسموح عليا العصر و الدوخة 
أنا لقمة مطبوخة 
و الحلم كان حدوتة بأسمعها قبل ما أنام

مساك سكر 
خفيف الكالورى 
يتمنظر 
بضحكة يروق الحدوتة
و بسكوتة
تمس شفايفه تتكسر
و تبعت دعوة ف البوسطة
حضور عاجل 
و تمضى القصة ع النوتة

مجنون يا قلب الشجر
فايت الورق للريح
من غير جناح بيطير 
يرتعش 
و يعود بشوقه لجدره من تانى 
و إنت يا قلب خضار 
بتعد ف المواعيد 
مستنى كسوة عيد

ويحكى أن الإنتظار 
رامى الشروق ف المطبعة 
ليل إدلق غطى الورق 
محبوسة الخيوط البيض
ف زنزانة
و المتاح 
عرس الصبايا
حنة إيديا بلونك الأحمر 
قسم قلوبك حب و ابدرهم لفوق
زرع السما يغسل الورق و الليل
و بكرة شروق

قطى و فارى بيجروا ورايا 
نطوا ف قلبى 
إطرفت عينى 
بأنفخ بالشقلوب وأتارينى
مسمار متعلق ف مراية

مستنى إيه ؟
فك الكلمتين م الكيس 
قاعد حزين 
و معلق القهوة تنشف من دموعك
لون الحيطان باهت على السقعة
و القلب ساكت
ينفخ شوية بحرقة يطير الدخان 
على حيط الجيران يمكن عيونهم تنطرف 
و تبربش الأيام بنظرة 
تخلى روحك تتحدف

مسلسل

يعيش المسلسل 
لقلبك يسلسل
و عيشك يزلزل 
بيهرش ف عقلك
و يزرع فانوسه
يفك الإشارة 
و عينك فلوسه
و بنزينه يفلت 
يدوسك يعدى 
دماغك يصدى 
و يولع بنارك
يوكل وشوشه
يسمن أبيس اللى عايش شطارة
و تلحس من القهر صحن البصارة
يعيش المسلسل
بشحمه و لحمه
و تصريف حواجبه
و لف السوجارة

قشرة

أحلام العيال طوابير ملايكة

البرافانات مطلية دهب قشرة

و قشرة الروح الجوانية
شجرة
بتدوب ف شم الخشب

شايل ف قلبى حتتين صيغة خشب

بيضخ رنة كعب ف ضلوعى

شالك على ضلوعى بيدفى ف السكة

ريحك يطل سما

الخطوة ترمح فرس

و تنط بره الشال

تغلبنى فيك ضحكة

يفرطنى الهوا ع الأرض

أنزل على دموعى

و أعيشك سكة مفتوحة على الخارطة

جمال م الصبر مجروحة

و نخل ف واحة عطشانة

بتطرح و الجدور ع الصخر

يا شريانك

بيسقى الزحمة

و ينقطنى آخر الخط بالمالح

عطش طافح

يخروش الهوا ف جنحى

أطير للشط جار الضى

أعلى السد بين ليلك و بين رمشى

و أغمى الفجر

مطاط

روحك مطاط

أنفخها بجوز جنيهات

و إجرى بعيد على سرعة مية

الحشا ناشف م الحنية

بأعصر فيه و ينقط مية

مالح دمعه ف أرض رضية

مين قال تزرع يا غشيم فيا ؟

لميت سوسى جوة ضروسى

و جزيت ع الحلمين اللبنى

نخروا ف دمى

وجعين و الحيط شقت منى

نغز و قامت بينا خناقة

أنا و السطر و ولاعة

حطيت طقم سنان و لقتنى

علقت شفايفى ف شماعة