فيلم

و يبدأ فيلم بإعلانين بايخين
شقق كارتون شبه ديزنى
لسان حواديت و بيغيظنى
و خبطة يمين على الشاشة
أليس تنزل ف قلب مراية غشاشة
و تبقى أمير بلاد بنور
سلالم للسما بيانو
بيعزفها ورود جناحات
و بأتمشى ف ربيع مقامات
نجوم تضوى على جبينك
و ضيك سهر المسافات
يمرجحنى الهوا بحكايات
و بعد ساعات ربيعى يتقلب أصفر
و صوت بلياتشو بيزمر
يصحينى ف آخر لقطتين م الفيلم
سلام بالإيد ما لوش معنى
و تبقى نهاية مفتوحة
كإنه سراب
بيفرش مية فوق الأرض
دفا كراسى كانت فاضية ف وسط العرض
و بأقفل عينى بستارة
أضم حيطانى
غرقانة بدموع الناس
و أقول بكرة ها تتغير نهاية الفيلم
و ألم الضحك و الغنوة
و أنسى إنى ماليش أنفاس