حالة

أنا م العيون اللى ريقها بيشقق من ريحة الصور القديمة
تعزفنى
و العود ف لونك يرقرق على صفحة الموجة
لحنك يرد الروح
و أنا شال الشتا المجروح
معقود على خطوة الشمس
ميت حجاب مفتوح
فك الهوا
سمّى
فوق ضلفة القلب الخشب
تفتح
ركب صور للبحر
و إفرد يديك
ضلك ف السما
كانه طير
وقف هنا و إقطع طريق / على أى طيف من غير حريق
عدا الطريق بإشارة حمرا
داء الغروب صاب النفس
كح الهوا طيفك
و لميت الجناح
من غير أسامى و فين ده راح ؟
طبقهم ف الدولاب
نفحة من سكة ضباب